Коста Рика Улсын Сан Жосе хотод 2025 оны наймдугаар сарын 24-нөөс, есдүгээр сарын 5-ны өдрүүдэд пауэрлифтингийн өсвөр үе, залуучуудын дэлхийн аварга шалгаруулах тэмцээн явагдаж өндөрлөнө. Өсвөр үе, залуучуудын “Equipped” пауэрлифтингийн ДАШТ-д Монголын пауэрлифтингийн нэгдсэн холбооны залуучуудын шигшээ багийн тамирчин О.Хас -74 кг-ын жинд газраас штанг таталтын төрөлд 262.5 кг-ыг өргөж мөнгөн медаль хүртсэн. “Strong” клубийн тамирчин Отгонбаатарын Хастай ярилцлаа.

 -Пауэрлифтингийн залуучуудын дэлхийн аваргаас мөнгөн медаль хүртсэнд баяр хүргэе.

       -Баярлалаа

 -Энэ удаагийн ДАШТ-д хэдэн кг-ын жинд  өрсөлдсөн бэ?

     -Энэ удаагийн “Equpped Powerlifting” ДАШТ-ий залуучуудын -74 kг-ын жинд өрсөлдөж суултаар  255 кг-ыг, хэвтээ шахалтаар 130 кг-ыг, таталтаар 262.5 кг-ыг өргөсөн. Таталтын төрөлд 262.5 кг-ыг өргөсөн амжилтаар ДАШТ-д  хоёрдугаар байрт орж, мөнгөн медаль хүртсэн.

 -Монголд үзүүлж байсан хувийн дээд амжилтаа ДАШТ-д ахиулж чадсан уу?

       -Яг ч хүссэн амжилтаа гаргаж чадаагүй. Анхны оролцсон ДАШТ байсан. Тийм болохоор туршлага дутаж, суултын оролтоо бүрэн хийж амжаагүй алдсан.

-ДАШТ-д  их хол Америк тивд Коста Рика Улсад болжээ. Манай улсаас хоёр тамирчин оролцсон гэв үү?

     -Тийм ээ, их хол болсон. Тэмцээн их хол болж, тэмцээний зардал их өндөр байсан. Энэ удаагийн ДАШТ-д хоёулаа явсан. МПНХ-ны залуучуудын шигшээ багийн тамирчин ОУХМ Ж.Баярмагнай 120 кг-ын жингийн суултын төрөлд хүрэл медаль, нийлбэр дүнгээр хүрэл медаль хүртсэн.

     Миний ДАШТ-ий зардал мөнгөнд маш том хувь оруулсан “Моннис Моторс” компани, Хөвсгөл аймгийн Засаг даргын Тамгын газар,  Хөвсгөл аймгийн пауэрлифтингийн салбар хороо,  “Steel gym” мөн үргэлж намайг дэмжиж, ард минь байдаг аав, ээж, ах, дүү, найз, нөхөд нартаа бүгдэд нь баярлалаа.

-Манай уншигчдад өөрийгөө танилцуулахгүй юу?

     -Намайг Батбаяр овогтой Хас гэдэг. Хөвсгөл аймгийн Рэнчинлхүмбэ суманд төрж, өссөн.  Аав Л.Отгонбаатар, ээж Г. Батбаяр, дүү О. Цэлмэг нарын хамт амьдардаг.

-Багадаа спортын ямар төрлөөр хичээллэж байсан бэ?

     -Бокст их дуртай байсан. Одоо ч дуртай. Бас хайрлаж, хүндэлж явдаг  спортын төрөл байгаа юм.

-Яагаад хүчний спорт пауэрлифтингийн спортыг сонгож хичээллэх болсон юм бэ?

     -Анх GYM-д очиж, үеийн залуучуудыг  штанг өргөж байхыг харсан. Тэд намайг нэг өргөөд үзээч гэлээ. Манай найзууд 140 кг-ыг татаж үзэж байсан. Тэр үеэс хойш “NGYM”-ын Б.Амартүвшин багшийн удирдлага дор бэлтэл хийдэг болсон.

 -Пауэрлифтингийн спортоор хэд дэх жилдээ хичээллэж байгаа вэ?

   - 2019 оноос хойш гэхээр зургаа дахь жилдээ хичээллэж байна.

-Пауэрлифтингийн спортын чухам  юу нь өөрийн чинь сонирхлыг татсан бэ?

     -Бие баялдрын өв тэгш хөгжил, баг хамт олны уур амьсгалд нь өөрийн эрхгүй татагдсан.  Мөн өөрийн өргөж байгаа хамгийн хүнд жингээс авах мэдрэмж гоё. Мөн өөрөөс гарч байгаа эмоци гээд л их олон зүйл бий.

-Пауэрлифтингийн хэвтээ шахалт, суулт, татал гэсэн гурван төрлөөр нь хичээллэдэг үү?

    -Тийм ээ, таталт, шахалт, суултын гурван төрлөөр хичээллэдэг.

-Одоо ямар клубийн тамирчин бэ?

     - “Strong” клуб дээр Х.Энхболд багшийн удирдлага дор бэлтгэл, сургуулилалтаа хийдэг.

-Спортын ямар зэрэг, цолтой тамирчин бэ?

     -Сая ДАШТ дээр спортын дэд мастерийн болзол хангасан байгаа.

-Пауэрлифтингийн спортоор гаргасан амжилтаа сонирхуулахгүй юу?

     - 2020  онд “Raw classic” УАШТ  өсвөр үеийн анилалд суултаар хүрэл, таталтаар алт, нийлбэрээр алтан медаль хүртсэн.  207.5 кг-ыг татаж рекорд дээд амжилт тогтоож байсан. 2021 онд залуучууд 74 кг-д суулт, таталтаар 2-р байр, 2022 онд залуучууд  66 кг-ын жинд суулт, таталтын  нийлбэрээр 1-р байр орж байсан.  2024 онд 74 кг-ын жинд залуучуудын ангилалд суулт, таталтын нийлбэрээр 2-р байрт орсон.  2025 онд суулт, таталтын  нийлбэрээр 1-р байр. “Equpped Powerlifting” залуучуудын тэмцээнд  66 кг-ын жинд 2022 онд таталтаар 1-р байрт шалгарсан. Залуучуудын таталтын төрөлд  237.5 кг-ыг татаж рекорд амжилт тогтоосон.   2024 онд суулт, таталтаар 1-р байр, нийлбэрээр 2-р байр мөнгөн медаль.  2025 онд залуучуудын ангиллын 74 кг-ын жинд суулт, таталтын нийлбэрээр 1-р байрт орж, алтан медаль хүртэж байсан.

–Одоо дараагийн оролцох ямар тэмцээнүүд  байгаа вэ?

     -Төлөвлөсөн тэмцээн яг одоогоор байхгүй байгаа.