Тайланд Улсын Бангкок хотод 57 дахь удаагийн бодибилдингийн Азийн аварга шалгаруулах тэмцээн болж өндөрлөв.  Азийн аваргад МБФХ-ны тамирчин Цогбаатарын Цогмаа амжилттай оролцож “Спорт модель” ангилалд алт, “Спорт модель +35” ангилалд мөнгө, “Вэллнэсс модель” ангилалд  алтан медаль тус тус  хүртсэн юм. Ази тивийн аваргаас хошой алтан медаль хүртсэн Ц.Цогмаатай ярилцлаа. 

  –Бодибилдинг, фитнесийн Ази тивийн хошой аварга болсонд баяр хүргэе.

        -Баярлалаа.

-Ази тивийн аварга шалгаруулах тэмцээнд ямар, төрөл ангилалд өрсөлдөж алт, мөнгөн медаль хүртэв ээ?

        -Ази тивийн аварга шалгаруулах 57 дахь удаагийн аварга шалгаруулах тэмцээнд Монгол Улсаа төлөөлөөд нийт найман тамирчин явсан. Би Азийн аваргын “Спорт модель” ангилалд нэг алт, “Спорт модель +35” ангилалд нэг мөнгө, “Вэллнэсс модель” ангилалд нэг алтан медаль тус тус  хүртсэн.      

-Энэ жилийн Азийн аварга шалгаруулах тэмцээний онцлог юу байв?

    -Анх удаа Азийн аврага шалгаруулах тэмцээнд өрсөлдөж үзлээ. Азийн аваргад 28 орны 300-гаад тамирчин өрсөлдсөн. Маш ширүүн өрсөлдөөнтэй, сайхан л тэмцээн болж өндөрлөсөн. Манай Монголын багийн хувцас гоё байсан шүү.

-Та өөрийгөө манай уншигчдад танилцуулахгүй юу?

       -Намайг Цогбаатарын Цогмаа гэдэг. Монголын бодибилдинг, фитнесийн холбоонынарийн бичиг. Харин одоо тамирчин болоод, нэмээд Ази тивийн аварга болчихлоо.  

-Одоо ямар клубт, хэн багшийн удирдлага дор бэлтгэл, сургуулилалтаа хийж байгаа вэ?

        -Өөрийн хувийн бэлтгэлээ “GOKU” gym дээр дэлхийн хошой аварга Адъяахүү багшийнхаа удирдлага дор бэлтгэл, сургуулилалтаа хийдэг.

-Бодибилдинг, фитнесийн спортоор хэд жилдээ хичээллэж байгаа вэ?

      -Би бодибилдинг, фитнесийн спортоор тасралтгүй зургаан жил хичээллэж байгаа.

-Спортын ямар зэрэг, цолтой тамирчин бэ?

       -Одоо удахгүй, Олон хэмжээний мастерын цол тэмдгээ авах гэж байгаа.     

-Яагаад энэ спортыг сонгож хичээллэх болсон юм бэ?

     –Анх хичээллэж эхлэхдээ бол тэмцээн үзэж байгаад дараа жил тайзан дээр гарна гэж бодолтой байсан юм. Тэгсэн чинь тэмцээн үзэхээр тэмцээний тайз соронзон мэт татдаг юм билээ. Тэмцээний тайзан дээр гарч үзэх, ялалт байгуулж үзмээр санагдаад болдоггүй.

Тэр үеэс хүсэл мөрөөдөл, дэврүүн сэтгэлдээ хөтлөгдөөд тэмцээнд орсон. Тэгээд л  тэр үеэс хойш тасралтгүй тэмцээнүүдэд орж явсан гэхдээ дандаа л  медалиас мултраад байв. Тэгэж явсаар байгаад өнөөдөрийн энэ өндөрлөгт ирчихсэн дээ. Азийн аваргаас өмнө тэмцээнд оролцож 12 удаа ялагдаж үзсэн болохоор Азийн аваргаас ялалт аваад төрийн дууллаа сонсоод асгартал уйлсандаа.

-Бодибилдинг, фитнесийн спортоор хичээллэсэн үеэс хойших томоохон амжилтаасаа сонирхуулахгүй юу?

     -Азийн аваргаас өмнө Өвөр Монголын Өөртөө Засах Орны Хөх хотод зургадугаар сарын 29-ний өдөр зохион байгуулагаддаг гурван улсын “Чийрэг цом” гэж тэмцээнд орж  хоёр алт, нэг мөнгө , нэг хүрэл медаль авсан амжилттай оролцсон.

-Чөлөөт цагаараа чөлөөт фитнесээс гадна өөр юу хийх дуртай вэ?

       -Ар гэрийн амьдрал, бэлтгэл сургуулилалт гээд явахаар чөлөөт цаг ер нь их ховор болчихдог. Мэдээж хувийн зохион байгуулалт сахилга бат их чухал байдаг.

–Өөрийг тань дагаад гэр бүлийнхэн чинь фитнесээр хичээллэдэггүй?

      -Мэдээж ар гэрийн ажлаа орхигдуулж хаяхгүй амжуулахыг хичээнэ. Би чинь тамирчин ч ээж хүн шүү дээ. Аль болохоор бүгдийг амжуулахыг л хичээдэг. Миний хүү одоо 15 настай том залуу байгаа. Жүдо бөхөөр хичээллэдэг.

–Бэлтгэл, сургуулилалт гээд явахаар ар гэрийн амьдрал хаягдах тал гардаг уу?

      -Өглөө 05:00 цагт миний амьдрал эхэлдэг. Тэгээд ямар ч их ажилтай байсан амжуулаад эхлээд заавал бэлтгэлээ хийхийг боддог.

-Одоо дараагийн оролцох ямар тэмцээнүүд хүлээж байгаа вэ?

-Одоо дараагийн оролцох тэмцээн гэвэл ирэх арваннэгдүгээр сарын 1-ний өдөр болох дэлхийн аварга шалгаруулах тэмцээн байгаа.

Харин одоо хариад бэлтгэлээ хийж эхэлнэ. Дэлхийн аваргын бэлтгэлдээ орно доо.