Зэвсэгт хүчний хуурай замын цэргийн командлалын Холбооны хээрийн зангилгааны инженер дэслэгч Б.Ундрах “Сэлэнгэ-2025” хээрийн сургуулийн хоёр орны цэргийн алба хаагчдад гийртэй үзүүлэх тоглолтыг толилууллаа. Тэрбээр бүсгүй хүнд баймгүй эр зоригийг харуулж гийрийг “бөмбөг” шиг шидэж тоглосон нь үзэгчдийг байлдан дагуулсан юм.

      Дэслэгч Б.Ундрах нь ҮБХИС-ийн сонсогч байхдаа туухай өргөлтийн спортоор тив дэлхийд танигдсан бүсгүй бөгөөд 2023, 2024 онд дэлхийн аваргын алтан медаль, 2023 онд Азийн аваргын алтан медалийг хүртсэн бахдам амжилтын эзэн билээ. 2025 оны өвөл олон улсын хэмжээний мастер цолоо хүртсэн тэрбээр сүүлийн жилүүдэд зэвсэгт хүчний аварга шалгаруулах тэмцээний медалийн тавцнаас бууж үзээгүй.

      2023 оны зэвсэгт хүчний аварга шалгаруулах туухай өргөлтийн тэмцээнд өөрийн жиндээ мөнгө, хүрэл, 2024 онд нэг алт, хоёр хүрэл, 2025 онд хоёр алт, нэг мөнгөн медалийг энгэртээ гялалзуулсан ийм л тамирчин алба хаагч юм.