Азийн олимпын зөвлөл болон Азийн холимог тулааны холбоо хамтран “Холимог тулааны шүүгч, дасгалжуулагчдын анхдугаар хөгжлийн хөтөлбөр”-ийг хэрэгжүүлж байна. Тус хөтөлбөрийн сургалт наймдугаар 25-27-ны өдрүүдэд Бахрейн Улсын нийслэл Манама хотод явагдана. Сургалт хөтөлбөр нь Ази тив дэх холимог тулааны спортын хөгжлийг дэмжих, шүүгч дасгалжуулагчдын мэдлэгийг тэлж, ур чадварыг нэмэгдүүлэн сайжруулах зорилгоор зохион байгуулагдаж байгаа юм.

      Монголын холимог тулааны холбооны Шүүгчдийн зөвлөлийн гишүүн Б.Долгорсүрэн, Ж.Лхагвабат, Баянгол дүүргийн Хүүхэд, залуучуудын соёлын ордны холимог тулааны дугуйлангийн дасгалжуулагч П.Энх-Эрдэнэ, "Ширэн бээлий" клубийн дасгалжуулагч Г.Чулуунхуяг нар энэхүү хөтөлбөрт хамрагдаж номын дуу сонсох болно.

      Улмаар шүүгч, дасгалжуулагч нар маань хөтөлбөрт сурч мэдсэн зүйлсээ бататган наймдугаар сарын 28-30-ны өдрүүдэд Бахрейн Улсад зохион байгуулагдах холимог тулааны Ази тивийн залуучуудын аварга шалгаруулах тэмцээнд ажиллах юм. Ташрамд дурдахад Монголын холимог тулааны холбооны Шүүгчдийн зөвлөлийн гишүүн Ч.Бат-Амгалан Азийн холимог тулааны холбооны урилгаар тус тэмцээн дээр Олон улсын техникийн ажилтнаар ажиллахаар болоод байгаа юм.