Олимпын мөнгөн медальт, дэлхийн хошой аварга, Ази тивийн аварга, Монгол Улсын Хөдөлмөрийн баатар, гавьяат тамирчин, “XX зууны шилдэг тамирчин” Зэвэгийн Ойдов 1949 оны энэ өдөр Өвөрхангай аймгийн Хархорин суманд мэндэлжээ. З.Ойдов 1965 оноос хойш чөлөөт бөхөөр хичээллэж эхэлсэн байдаг. Тэрбээр 1974 онд Турк Улсад болсон “Станбул-1974” ДАШТ-ээс алт, 1975 онд ЗХУ, одоогийн Беларусь Улсад болсон “Минск-1975” ДАШТ-ээс алтан медаль хүртэж, дэлхийн хошой аварга цол хүртсэн. Мөн “Лозанна-1977” ДАШТ-ээс хүрэл медаль хүртэж байсан юм.

    1976 онд Канад Улсад болсон “Монреаль-1976” олимпын наадмаас мөнгөн медаль,1974 онд  Иран Улсад болсон “Тегеран-1974” Азийн аваргаас мөнгөн медаль, 1978 онд Тайланд Улсад болсон “Бангкок-1978” Ази тивийн аварга шалгаруулах тэмцээнээс алтан медаль хүртэж, Азийн аварга болж байлаа.

   Мөн 1975 онд Ази, Африкийн орны “Шилдэг бөх”-д олгодог цомоор шагнуулж байв. Дэлхийн хошой аварга З.Ойдов өмсөх мэх хийсэн бөхийн гар, хөлийг холбож, цэвэр дардаг байсан дархан мэхийг Дэлхийн бөхийн нэгдсэн холбоо, “FILA”-гаас хүлээн зөвшөөрснөөр дэлхийн чөлөөт бөхийн төрөлд “Ойдов” мэх хэмээн албан ёсоор баталгаажуулсан юм.