Хятадын Чендү хотод дөрвөн жил тутамд нэг удаа зохион байгуулагддаг “Дэлхийн спортын наадам” энэ сарын 7-17-ний өдрүүдэд  болно. 1981 онд АНУ-д анх удаа зохион байгуулагдаж байсан тус наадам 12 дахь удаагаа зохион байгуулагдаж байгаа наадам “хөшиг”-өө нээхэд нэг хоног үлдээд байна.

     Дэлхийн 114 улсын 4000 тамирчин чуулах “Дэлхийн спортын наадам”-д хүч сорих Монгол Улсын шигшээ баг тамирчдыг БТСУХ-ны Төрийн захиргааны удирдлагын газрын дарга О.Баттулга хүлээн авч Монгол Улсын төрийн далбааг гардуулж амжилт хүсэв.  Мөн БТСУХ-ны дарга Э.Билэгт баг тамирчдыг бүх талаар дэмжин ажиллах болно гэдгээ илэрхийлэв.

   Олимпын бус төрлийн спортын дэлхийд ранкаар тэргүүлэгч тамирчид өрсөлддөг чансаа өндөр тус тэмцээнд Монгол Улсаа төлөөлж жюү жицү, пара жюү жицү, пауэрлифтинг, биллиард, дуатлон, самбо бөхийн төрөлд хүч үзнэ.

Энэхүү 44 жилийн түүхтэй “Дэлхийн спортын наадам”- нь жендерийн тэгш оролцоог хамгийн сайн ханган зохион байгуулагддаг томоохон наадмын нэг юм. 12 дахь удаагийн наадмыг хүлээн авагч БНХАУ-ын Чэндү хот баг тамирчдыг хүлээн авч тамирчдын хотхонд байрлуулж эхэлсэн гэдгээ албан ёсоор мэдэгджээ.