Монголын чөлөөт бөхийн холбооны ерөнхий нарийн бичгийн дарга Батсүхийн Мянганбаяр энэ сарын 2-ны өдөр АНУ-ын Флорида мужийн Маями хотод АНУ-ын “NCAA” буюу Америкийн Үндэсний их сургуулиудын тамирчдын холбооны алдрын танхимын гишүүнээр өргөмжлөгдлөө.

      Энэхүү алдрын танхимд монгол хүн мөн л анх удаа орж байгаа бөгөөд түүний оюутан ахуй цагтаа үзүүлсэн өөрийнх нь амжилт болох (NCAA)-д дивизон III-т гурван удаа жил дараалан түрүүлсэн амжилт юм. Division III нь хамгийн олон баг буюу 100 гаруй багаас бүрддэг ба мөн академик боловсролыг давхар эзэмшин суралцдаг оюутнууд өрсөлддөгөөрөө онцлогтой юм.

      Б.Мянганбаяр нь одоогоос 20 жилийн өмнө Сэйнт Бэнэдикт'с дунд сургуулийг дүүргэж, Миннесота мужийн Сэйнт Жонсын их сургуульд 100 хувийн тэтгэлгээр “Математик, бизнесийн удирдлага” мэргэжлээр 2011 онд бакалавр зэрэгтэй төгссөн юм. Ийнхүү гурван жил дараалан АНУ-ын дунд сургууль, их сургууль, үндэсний хэмжээнд гэсэн “Алдрын танхим”-уудад өөрийн нэрийг Монгол Улсынхаа нэрэн дор мөнхлөн үлдээж байна.