“MAS Wrestling” буюу модон барилдааны VII удаагийн дэлхийн аварга шалгаруулах тэмцээн Архангай аймагт анх удаа болж өндөрлөв. Энэ удаагийн ДАШТ-ий өсвөр үеийн охидын 50 кг-ын жинд алтан медаль хүртэж, дэлхийн аварга болсон Сэлэнгэ аймгийн Мандал сумын тамирчин охин Мөнхтуяагийн Анударьтай ярилцлаа.

 –Мас рестлингийн дэлхийн аварга шалгаруулах тэмцээнд түрүүлж, алтан медаль хүртсэнд баяр хүргэе.

       -Сайн байна уу. Танд маш их баярлалаа. Мас-рестлингийн ДАШТ-д анх удаа оролцож, алтан медаль хүртсэндээ баяртай байна.

-Миний дүү өөрийгөө танилцуулахгүй юу?

       -Намайг Мөнхтуяагийн Анударь гэдэг.

-Сэлэнгэ аймгийн аль сумын хүүхэд вэ?

       -Сэлэнгэ аймгийн Мандал сум буюу Зүүнхараа хотод амьдардаг.

-Одоо хэдэн настай вэ?

       -Би сая хоёр хоногийн өмнө 17 нас хүрсэн.

-Ямар сургуулийн хэддүгээр ангид сурдаг вэ?

     -“Хэрх” ерөнхий боловсролын дунд сургуулийн З.Отгонжаргал багштай 12-ын “Б” ангид суралцдаг.

 –Мас рестлинг буюу модон барилдааны спортоор хэд жилдээ хичээллэж байгаа вэ?

       -За би мас-рестлинг буюу модон барилдааны спортоор 2025 оны хоёрдугаар сараас хойш хичээллэсэн гэхээр долоон сар болох гэж байгаа юм байна.

-Спортын ямар зэрэг, цолтой тамирчин бэ?

       -Мас-рестлингээр хичээллээд удаагүй болохоор одоогоор хараахан спортын зэрэг, цол авч амжаагүй байгаа.

 -Яагаад энэ спортыг сонирхож хичээллэх болов?

        -Анх Сэлэнгэ аймгийн Зүүнхараа хотод болсон аймгийн аварга шалгаруулах тэмцээнд орж үзсэн. Тэгсэн чинь мас-рестлинг үнэхээр гоё спорт байсан. Надад мас-рестлингийн спорт таалагдсан болохоор хичээллэж эхэлсэн. Бие бялдрыг өв тэгш хөгжүүлж чаддаг болохоор сонирхож хичээллэсэн юм.

-Үүнээс өмнө өөр спортын төрлөөр хичээллэж байсан уу?

         -Өөр хичээллэдэг спорт гэвэл волейболын болон хөнгөн атлетикийн спорт байгаа.  Миний волейболын анхны багш гэвэл Баттулгын Оч-Эрдэнэ гэж хүн байгаа. Багшийнхаа шавь нь болоод  зургаан жил болж байна. Харин хөнгөн атлетикийн багш Алтанчимэг гэж хүн бий.  Багш, шавь болоод бас л зургаан жил болж байгаа юм байна. Одоо би волейбол, хөнгөн атлетик, мас-рестлинг гэсэн энэ гурван спортын төрлийг хослуулан хичээллэж байгаа.

-ДАШТ-д хэдэн кг-ын жинд оролцож алтан медаль хүртэв?

        -Мас-рестлингийн ДАШТ-ий охидын 50 кг-ын  жинд өрсөлдөж алтан медаль хүртэж, дэлхийн аварга гэсэн эрхэм, нэр хүндтэй цолыг хүртээд байгаа.

–Энэ удаагийн ДАШТ-д хэдэн орны тамирчидтай өрсөлдөв?

         -Дэлхийн аварга шалгаруулах тэмцээнд нийт 34 орны 300 гаруй баг тамирчин өрсөлдсөн. Манай жинд нийт зургаан тамирчин байсан.

-Хамгийн хүчтэй өрсөлдөгч ямар улсын тамирчин байсан бэ?

           -Дэлхийн аваргын хамгийн хүчтэй өрсөлдөгч гэвэл Орос Улсын тамирчин байлаа. ОХУ-ын  Tuyaara гэж тамирчин үнэхээр хүчтэй өрсөлдөгч байсан.

-Дэлхийн аваргаас өмнө ямар тэмцээнүүдэд оролцож, ямар амжилтууд гаргаж байсан бэ?

           -Волейболын өсвөр үеийн улсын аварга шалгаруулах тэмцээний гурван алтан медальтай. Олон улсын тэмцээний тусгай байрын шагнал хүртэж байсан. Аймаг бүсийн тэмцээний таван алт, хоёр мөнгө, долоон хүрэл медальтай.  Харин хөнгөн атлетикийн өсвөр үеийн УАШТ-ээс нэг хүрэл медаль хүртэж байсан.  Аймаг болон бүсийн аварга шалгаруулах тэмцээний гурван алт, гурван мөнгө, гурван хүрэлтэй медальтай.  Мас-рестлэнгийн ДАШТ-ий алт,  улсын аваргын алтан медальтай.  УАШТ-ий “Шилдэг тамирчин” шагналыг хүртэж байсан. Модон барилдааны Сэлэнгэ аймгийн аварга шалгаруулах тэмцээний гурван алтан медальтай.

 -Модон барилдааны спорт гарын хүч, нурууны тамир их шаарддаг уу?

         -Модон барилдаанд бүх биеийн булчин зэрэг ажилладаг.  Хүч, тэсрэлт маш их шаарддаг.

–Одоо дараагийн оролцох ямар тэмцээнүүд хүлээж байгаа вэ?

       -Одоо төвийн бүс , мөн хангайн бүсийн тэмцээн хүлээж байна. Ази тивийн аварга шалгаруулах тэмцээн гээд зөндөө олон тэмцээн хүлээж байгаа. За тэгээд тусалж дэмжсэн гэр бүл, багш нартаа баярлалаа гэж хэлмээр байна. Бас "Энх Хүдэр Эрдэнэс” ХХК-ийн Хүдэрхүү ахдаа маш их баярлалаа.