Монгол үндэстний язгуур урлагийг орчин цагийн хөгжимтэй хослуулсан бүтээл туурвидгаараа Өвөр Монголын “Хангай” хамтлаг бусдаас онцлогтой билээ. Тэд морин хуур, уртын дуу, хөөмий гээд язгуур урлагийн төрлүүдийг ашиглан шинэ цагийн урлагийн Монгол урсгалыг үзэгч түмэндээ хүргэсээр явна. “Хангай” хамтлаг нь 2004 онд байгуулагдаж, Хөхнуур, Бээжин, Хөлөнбуйр, Улаанхад зэрэг нутаг нутгийн долоон монгол залуусаас хамтлагийн гишүүд бүрдсэн байдаг. “Хангай” хамтлагийн дуучин, гитарчин Ялалт, хамтлагийн товшуур хөгжимчин, дуучин Илч, хамтлагийн морин хуурч, хөөмийч Бат-Багана, дуучин Хурцхүү, хамтлагийн басс гитарчин Нью Шинь, бөмбөрчин Ли Дань, гитарчин, шанз хөгжимчин Шюй Жиньчи нараас бүрдэнэ.

    Одоогоор “Хангай” хамтлаг дэлхий дахинд танигдсан Хятад Улсын Өвөр Монголын хамгийн алдартай хамтлагийн нэг болжээ. Хамтлагийн гишүүнд морин хуур, товшуур, гитар, бөмбөр зэрэг хөгжмөөр тоглодог. Хангай хамтлагийн залуус нь монголын ардын дуу, хөгжмийн урлагийн гайхамшигт хүч, рок дуу хөгжмийн сүр хүчийг хослуулан дэлхийн хүртээл болгож, монгол соёл болон монгол түүхийн орон зайд таниулж яваа.

    Монгол үндэстний язгуур урлагийн “Хангай” хамтлаг Япон Улсад болдог Азийн рок хөгжмийн хамгийн том “Фүжи” наадамд 2011, 2019 онд уригдаж оролцсон. “Хангай” хамтлаг “Нутаг” цомгоороо алдаршсанаас хойш дэлхийн дуу хөгжмийн томоохон фестивалиудад тогтмол оролцон фэнүүдийнхээ хүрээг тэлсээр байгаа. Тус хамтлагийн 2019 онд гаргасан “Хангай жааз үлээвэр хөгжим” цомог нь ихээхэн шинэлэг уран бүтээл болсон хэмээн мэргэжлийнхэнд үнэлэгдсэн билээ.

     Цомгийг Канадын хөгжмийн нэрт найруулагч Кард Ричардсоны оролцоотойгоор гаргажээ. “Хангай” хамтлаг энэхүү нэрт найруулагчтай “Цоохор морь” цомог дээр өмнө нь мөн хамтран ажиллаж байсан юм. Найруулагч Кард Ричардсон “Rage Against the machine” хамтлагийн “Rage Against the machine” цомог, “Red hot chili Peppers" хамтлагийн алдарт “Эхийн сүү” цомог дээр ажиллаж нэр алдраа дуурсгаж байсан нэгэн юм.

     Уртын дуу, хөөмий, морин хуурын хослолоороо олны сонорыг мялааж яваа тус хамтлаг дэлхийн 60 гаруй улсад аялан тогложээ. Тэд “Womad” фестиваль, Данийн “Roskilde”, металл рокийн “Wacken open air”, Канадын “Edmonton folk” фестиваль, Австралийн үндэсний дуу хөгжмийн “Woodford”, Мексикийн “Ollinkan” наадмуудад амжилттай оролцож байв. Мөн “Rollingstone” сэтгүүлээс хамгийн супер хөгжмийн наадам хэмээн цоллогдсон.  “Bonnaroo” фестивальд оролцож Чикагогийн дэлхийн дуу хөгжмийн наадамд “Eminem”, “Neil Young”, “Arcade fire”-тай хамт тоглосон юм. Америкийн “Кеннидийн урлагийн төв”, “Линкольны төв”-д ч тоглолтоо хийж байсан байлаа.

        Канадын алдарт хөгжмийн продюсер Боб Эзрин Өвөр Монголын уламжлалт хөгжмийн “Хангай” хамтлагтай хамтран ажилладаг. Боб Эзрин нь дэлхийн алдартай хөгжмийн продюсер бөгөөд Пинк Флойдын “The Wall, Kiss’ Destroyer” болон Элис Күүперийн “Welcome to My Nightmare” зэрэг альбомуудад продюсерээр ажиллаж олонд танигдсан хүн юм. Эзринийг Хятатад зочлох үеэр “Хангай” хамтлагийн ахлагч түүнтэй уулзаж ярилцсанаар хамтран ажиллах боломж бүрдсэн аж. Ийнхүү дэлхийн хамгийн алдартай, авьяаслаг хөгжмийн продюсертай Монголын уламжлалт хөгжмийн хамтлаг хамтарснаар ямар бүтээл гарах бол гэсэн хүлээлт хөгжим судлаачдын дунд байсан билээ.

      “Хангай” хамтлаг АНУ-ын Ричмонд хотод тоглолтоо хийсэн. “Richmond News” сонинд “Найман гишүүнтэй “Хангай” хамтлаг Монгол ардын хөгжмийг панк рок урсгалтай хольж уран бүтээлээ туурвидаг юм байна. Хорин жилийн түүхтэй тус хамтлаг “Sing my Song” реалити шоу нэвтрүүлэгт оролцон түрүүлснээр Хятадад алдартай болжээ. Хамтлаг Канадын Ванкүүвэр аралд тоглолтоо амжилттай хийсэн бөгөөд Ричмондод тоглосныхоо дараа шинэ цомгийнхоо зургийг авах юм. Учир нь, Ванкүүвэр арлын байгаль Өвөр Монголынхтой төстэй учир шинэ цомгоо бүтээхэд хамгийн тохиромжтой газар хэмээн ярьлаа” хэмээн бичиж байв.