Япон Улсын Чиба хотод  жюү жицүгийн “IBJJF”-ийн  Ази тивийн аварга шалгаруулах нээлттэй тэмцээн болж өндөрлөв. Тус тэмцээний насанд хүрэгчдийн ягаан бүсний 64 кг-ын жинд барилдсан Архангай аймгийн харьяат, “JUMP Mongolia академи”-ийн тамирчин Батсуурийн Баяртулга мөнгөн медаль хүртсэн. Түүнтэй цөөн хором ярилцлаа.

–Жюү жицүгийн Ази тивийн аварга шалгаруулах тэмцээний насанд хүрэгчийн ягаан бүсний 64 кг-ын жинд мөнгөн медаль хүртсэнд баяр хүргэе.

      -Баярлалаа.

-Миний дүү өөрийгөө танилцуулахгүй юу?

      -Намайг Батсуурийн Баяртулга гэдэг. Манайх ам бүл тавуулаа. Би айлын дунд хүүхэд.

-Одоо хэдэн настай. Аль аймаг, хотод төрсөн хүүхэд вэ?

     -Би одоо 22 настай.  Архангай аймгийн Булган суманд төрж өссөн.  Ерөнхий боловсролын дунд сургуулиа Архангай аймгийн 5-р сургуульд сурч, төгссөн.

–Багадаа спортын ямар төрлөөр хичээллэж байсан бэ?

      -Дунд сургуульд сурч байх үедээ жүдо бөхөөр хичээллэдэг байсан. Жүдо бөхөөс өөр спортын төрлөөр багадаа хичээллэж байгаагүй. Гэхдээ бүх спортын төрлийг сонирхдог.

-Одоо ямар сургуульд сурдаг вэ?

       -МУБИС-ийн Биеийн тамирын сургуулийн жюү жицүгийн дасгалжуулагч, спортын менежер “Жамп” гэсэн хоёр давхар мэргэжлээр сурч төгссөн байгаа.

 -Яагаад жюү жицүг сонгож хичээллэх болсон юм бэ?

        -Жүдо бөхөөр хичээллэдэг байх даа, нэг удаа жюү жицүгийн тэмцээнд орж үзсэн юм. Тэгсэн жюү жицү надад таалагдаад болдоггүй. Миний биеийн онцлог, барилдааны арга барилд яг таарсан төрөл юм шиг санагдсан. Тэр үед жүдо бөхөөсөө гараад жюү жицүгээр хичээллэж эхэлсэн. Намайг дунд сургуулийн 12-р ангийг төгсөх жил “Жамп” хөтөлбөр хэрэгжиж эхэлсэн цаг үе таарсан. Манай сургууль дээр жүдо бөхийн хоёр багш ирж, “Жамп” хөтөлбөрийн танилцуулгыг хийсэн юм.  Тэгээд л  тус хөтөлбөрт хамрагдаж жюү жицүгээр хичээллэх болсон.

 – Азийн аварга шалгаруулах  тэмцээнд хэдэн барилдаан хийж мөнгөн медаль хүртэв?

-Япон Улсад болсон жюү жицүгийн Азийн аварга шалгаруулах тэмцээнд таван барилдаан хийж, дөрвөн ялалт авч, нэг удаа хожигдол авч мөнгөн медаль хүртсэн байгаа.

 –Азийн аваргын алтан медалийн төлөө ямар улсын тамирчинтай барилдсан бэ?

      -Жюү жицүгийн Азийн аваргын алтан медалийн төлөө Өмнөд Солонгос Улсын тамирчинтай барилдсан байгаа.

-Жюү жицүгийн спортоор хэд дэх жилдээ хичээллэж байгаа вэ?

       -Жюү жицүгийн спортоор дөрвөн дэх жилдээ хичээллэж байна.

-Жюү жицүгийн спортоор хичээллэсэн үеэс хойших томоохон амжилтаасаа сонирхуулахгүй юу?

       -Жюү жицүгийн амжилтаасаа дурдвал дэлхийн аварга шалгаруулах тэмцээний цэнхэр бүсний 62 кг-ын жинд хүрэл медаль хүртэж байсан. Мөн жюү жицүгийн дэлхийн “Их дуулга” тэмцээний алтан медальтай.  Монгол Улсын УАШТ-ээс дөрвөн удаа алтан медаль медаль хүртсэн. “IBJJF” буюу Азийн жюү жицүгийн холбооны аварга шалгаруулах тэмцээнээс мөнгөн медаль, Зүүн Азийн аварга шалгаруулах тэмцээнээс хүрэл медаль, “Grand prix” тэмцээний шагналт 5-р байрт шалгарч байсан.