Жүдо бөхийн 2025 оны дэлхийн аварга шалгаруулах тэмцээний дөрөв дэх өдрийн барилдаан өнөөдөр Унгар Улсын Будапешт хотод эхэлнэ. Энэ удаагийн ДАШТ-д дэлхийн 93 орны эрэгтэй 294, эмэгтэй 262, нийт 556 жүдочин өрсөлдөж байгаа. Өнөөдөр эрэгтэйчүүдийн 81 кг, эмэгтэйчүүдийн 63 кг-ын жингийн барилдаан болно.

ЭРЭГТЭЙЧҮҮДИЙН 81 КГ-Д О.ШИНЭБАЯР

    Эрэгтэйчүүдийн 81 кг-ын жинд 45 тамирчин барилдана. Манай улсаас залуу тамирчин Оюунчимэгийн Шинэбаяр барилдана. Тэрбээр “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт АНЭУ-ын нэр дээр барилдаж буй Гүржийн ахмад, туршлагатай тамирчин, 35 настай Nugzari TATALASHVILI, Австрийн 21 настай залуу тамирчин Bernd FASCHING нарын хэн ялсантай хүч үзнэ. Хэрэв ялалт авч чадвал гуравдугаар тойрогт, шөвгийн 16-д барилдах боломж боломж нээгдэнэ.

ЭМЭГТЭЙЧҮҮДИЙН 63 КГ-Д

       Эмэгтэйчүүдийн 63 кг-ын жинд 44 тамирчин өрсөлдөнө. Манай улсаас дэлхийн аваргын хошой хүрэл медальт, МУГТ Лхагватогоогийн Энхрийлэн жин өгсөн анх удаа ДАШТ-ий 63 кг-ын жинд барилдана. Тэрбээр “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Хорватын Katarina KRISTO, Кубын Maylin DEL TORO CARVAJAL нарын хэн ялсантай барилдана. Хэрэв ялалт авч чадвал гуравдугаар тойрогт шөвгийн 16-д барилдах боломжтой болно.

     Азийн тивийн аварга, ОУХМ Болдын Ганхайч “В” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Өмнөд Солонгосын SHIN Chaewon, Чехийн Renata ZACHOVA нарын хэн ялсантай барилдана. Хэрэв ялалт авч чадвал гуравдугаар тойрогт , шөвгийн 16-д барилдах эрхтэй болох юм.