Австралийн Лаунцестон хотод болсон “Peppers Silo 2025” тэмцээнд Монгол улсаас үндэсний шигшээ багийн марафон гүйлтийн хоёр тамирчин оролцлоо. Энэ тэмцээнд Монголоос гадна Япон, Хонконг, Шинэ Зиланд, Их Британи, Франц, Норвеги зэрэг орны тамирчид уралдаж олон улсын цагийн амжилтаа ахиулсан байна. 

        Хагас марафон буюу 21 км зайн уралдаанд 1000 гаруй тамирчин гараанаас гарснаас гавьяат тамирчин Б.Сэр-Од 1:04:53 цагийн амжилтаар 13-р байрт орлоо. Эмэгтэйчүүдийн ангилалд Г.Хишигсайхан 1:13:54  цагийн амжилтаар зургаадугаар байрт орсон байна. Тэрбээр “Улаанбаатар 2025” олон улсын гүйлтийн 42 км 195 зайд түрүүлсний дараа энэ сарын олон улсын тэмцээнээ Австралиас эхлүүллээ. 

       Монголын тамирчдыг ирэх есдүгээр сард Япон Улсад болох хөнгөн атлетикийн дэлхийн аварга шалгаруулах тэмцээн хүлээж байгаа. Энэ тэмцээнд Дэлхийн хөнгөн атлетикийн холбооноос марафон гүйлтээр эрх авсан тамирчдын нэрсийг зарлахад Монгол Улсаас дөрвөн тамирчин оролцохоор болсон. Монгол Улсын гавьяат тамирчин Б.Сэр-Од болон ОУХМ Ц.Бямбажав нар эрчүүдээс эрхийн болзол хангасан. Мөн “Парис 2024” зуны олимпын наадамд уралдсан ОУХМ Г.Хишигсайхан, ОУХМ Б.Мөнхзаяа нар “Токио 2025”  ДАШТ-д оролцох дэлхийн марафончдын дунд багтсан.