Олон улсын олимпын хорооны эв санааны нэгдлээс “Милан Кортина 2026” өвлийн олимпын наадамд оролцох тамирчдад эрхээ авахад нь дэмжлэг үзүүлэх, тэдний өрсөлдөөнийг нэмэгдүүлэх зорилгоор цөөн тамирчдад урт хугацааны хөрөнгө оруулалт болгон тамирчдын тэтгэлэгт хөтөлбөрт хамруулж байгаа билээ.

        Тус хөтөлбөрт хамрагдаж буй тамирчид, дасгалжуулагч, холбооны төлөөллийг өнөөдөр ОУОХ-ны гишүүн, МҮОХ-ны ерөнхийлөгч Б. Баттүшиг, МҮОХ-ны ЕНБД Э. Бадар-Ууган нар “Олимпик хаус”-т хүлээн авч уулзан, тэтгэлгийг гардуулж бэлтгэл сургуулилалтын явц, олимпын эрхийн тэмцээнүүдэд хэрхэн оролцох талаар мэдээлэл солилцлоо.

      2026 оны хоёрдугаар сарын 22-ны өдрийг хүртэлх хугацаанд хамрагдах энэхүү тэтгэлэгт гүйлтийн цанын тамирчин Б.Ачбадрах- “Пёнчан 2018”, “Бээжин 2008” олимпын наадмын оролцогч, О. Золбаяр, “Лозанн 2020” залуучуудын өвлийн олимпын наадмын оролцогч, Т. Ариунболд ОУХМ болон тэшүүрийн шорт трэйкийн тамирчин Б.Гэрэлтуяа ОУХМ нар хамрагдаж байна.

       Энэ оны зургадугаар сараас тэшүүрийн тамирчид Өмнөд Солонгост хамтарсан бэлтгэлд хамрагдаж, улмаар аравдугаар сард болох дэлхийн цомын цуврал дөрвөн тэмцээнээс олимпын эрхээ авах бүрэн боломжтой бол олимпын хоёр эрхээ өвөртлөөд буй цанын тамирчид Тайланд Улсад долдугаар сард болох “FIS” оноо олгох роликтой цанын тэмцээнээр гараагаа эхэлнэ.

          Цанын холбооноос дахин хоёр тамирчин оролцуулах боломжийг судалж байгаа бөгөөд уулын цанын төрөлд дэмжлэг үзүүлсэн тохиолдолд мөн олимпын эрхээ авах боломж байгааг танилцуулав.