Японы мэргэжлийн сүмо бөхөд олон жил гадаад бөхчүүд, тэр дундаа Монгол бөхчүүдийн ноёрхож байгаа билээ. Тэгвэл Японы сүмо сонирхогчдын хүсэн хүлээж буй их аварга төрөх ойртож байна. Үүнд Японы ард түмний магнай тэнийж байгаа бололтой.  Японы алдарт ах дүү аварга болох 1994 онд аварга болсон Таканохана, 1998 онд аварга болсон Ваканохана нараас хойш Япончууд хүчтэй аварга цолтонтой болж чадаагүй.

     Япончуудын найдварыг тээж 2017 онд аварга болсон Кисеносато карьертаа хоёр удаа л түрүүлсэн. Маш их дарамт шахалт, бэртэл гэмтэл дунд шахагдсаар эрт зодог тайлсан. Японы үнэнч фенүүдийн хүлээлт дуусч шинэ, хүчтэй Ёкозунатай болох найдлагыг Оносато Дайки хүлээлгээд байгаа юм. Тэрбээр 2000 оны зургадугаар сарын 7-ны өдөр төрсөн. Энэ жил 25 нас хүрч байгаа сүмочин юм.

     Тэрбээр 2023 оны тавдугаар сарын башёд дээд зиндаанд анхны барилдаанаа хийж 2024 оны тав, есдүгээр саруудын барилдаан түрүүлж, 2024 оны арваннэгдүгээр сараас озеки цолтой барилдаж байгаа.  2025 оны гуравдугаар сарын башёд 12 даваа, гурван унаатайгаар түрүүлсэн. Харин одоо энэ сарын барилдаанд түрүүлж чадвал “Ёкозуна” цол хүртэх болзолтой барилдаж байна.

    Оносато энэ болзолыг башё дуусахаас өмнө биелүүлж 2025 оны долдугаар сарын барилдаанд аварга цолтой барилдах нь тодорхой болох шиг боллоо. Түүнийг Таканохана их аварга шиг даруу төлөв, аваргын харизматай, араваас дээш түрүүлж чадах дараагийн “Их аварга” болно гэж Японы сумо сонирхогчид бичсээр байна.