Арабын Нэгдсэн Эмират Улсын Абу Даби хотноо тавдугаар сарын 16-18-ны өдрүүдэд жюү жицүгийн “Гранд слам” тэмцээн болж өндөрлөв. Тус “Их дуулга” тэмцээний эрэгтэйчүүдийн  цэнхэр бүсний 77 кг-ын жинд мөнгөн медаль хүртсэн “Баялаг” клубийн тамирчин Булганхүүгийн Шинэзоригтой ярилцлаа.

–АНЭУ-ын Абу Даби хотод болсон жюү жицүгийн “Гранд слам” тэмцээний цэнхэр бүсний ангиллын 77 кг-ын жинд мөнгөн медаль хүртсэнд баяр хүргэе.

     -Танд баярлалаа.

 -Миний дүү өөрийгөө танилцуулахгүй юу?

     -Намайг Булганхүүгийн Шинэзориг гэдэг.

 -Одоо хэдэн настай. Аль аймаг, хотод төрсөн хүүхэд үү?

        -Би одоо 20 настай Баян-өлгий аймгийн Булган суманд төрсөн тэгээд 1-р ангиасаа хойш гэр бүлтэйгээ хотод суурьшиж амьдарч байгаа.

-Ямар сургуульд сурдаг вэ?

     -Би МУБИС БТ ангийн 2-р курсийн оюутан.

-Айлын хэд дэх хүүхэд вэ?

      -Айлын ууган хүүхэд.

-Багадаа барилддаг байв уу. Жюү жицүгээс өмнө бөхийн өөр төрлүүдээр хичээллэж байсан уу?

      -Аан би  анх 2020 онд Отгонбаатар багштай “Баялаг” клубт орж жүдо бөхийн спортоор анх удаагаа хичээллэж эхэлж байсан.

-Олимпын төрлийн бөхийн спортын олон төрөл байхад яагаад жюү жицүг сонгож хичээллэх болсон юм бэ?

       -Жюү жицүгийн хамт олны гэр бүлийн юм шиг халуун, дулаан эерэг уур амьсгал надад маш их таалагдсан. Тэгээд энэ спортод илүү их дурлаж, жюү жицүгийн спортоос аз жаргалыг мэдэрч, сайхан амьдрахыг хүсэж байна даа.

-Жюү жицүгийн тэмцээн бүсний ангилал, ур чадварын түвшингийн байдлаар нь зэрэглэж явуулдаг нь тамирчдад урам дэм, барилдах хүсэл сонирхлыг нь бадраадаг уу?

   -Тийм ээ, бүс болон насны ангиллаар явагддаг онцлогтой ямар ч насны хүн хичээллэх боломжтой спорт. Бусад спорт шиг насны хязгаар, зэрэглэл, түвшингийн ялгаа гэж байдаггүй. Хэн хүссэн, дуртай хүн хичээллэх боломжтой, нээлттэй, олон нийтийг хамруулж чаддаг агуу гайхамшигтай спорт.

-Абу Дабигийн “Гранд слам” тэмцээнд хэдэн барилдаан хийж мөнгөн медаль хүртэв?

    -Жюү жицүгийн “Абу Даби-2025”  их дуулгад дөрвөн барилдаан хийж мөнгөн медаль авсан.

-Бразилын Мело Рамсестай хэр хүчтэй, туршлагатай тамирчин байв. Дараа түүнтэй таарч барилдахад түүнийг ялах боломж байна уу?

     Бразилын Мело Рамсес сайн тамирчин байсан. Би өөрийн алдаанаасаа болж түүнд хожигдсон. Алдаагаа засаж, дараа түүнтэй таарвал заавал ялахын төлөө хичээж барилдана.

-Их дуулгаас хүрэл медаль хүртсэн ОХУ-ын Каплан Качиевтай таарч барилдсан уу?

    -Тийм ээ, хагас шигшээ дээр ОХУ-ын Каплан Качиевтэй таарч барилдсан.

-Жюү жицүгийн спортоор хэд дэх жилдээ хичээллэж байгаа вэ?

       -Жюү жицүгийн спортоор тууштай хичээллээд гурав дахь жилдээ орох гэж байна даа.

-Жюү жицүгийн спортоор хичээллэсэн үеэс хойших томоохон амжилтаасаа сонирхуулахгүй юу?

      -Жюү жицүгээр гаргасан томоохон амжилт гэвэл залуучуудын Азийн аваргын шагналт тавдугаар байр, Зүүн Азийн аварга шалгаруулах “U21” ангиллын тэмцээний хүрэл медальтай. Мөн “UNC” бүсний ангилалгүй УАШТ-ий мөнгө, “AJP TOUR” хөx бүсний ангиллын УАШТ-ий aлтан медалтай. Сая болсон “Абу Даби-2025” гран сламаас мөнгөн медаль хүртээд байна даа.