Арабын Нэгдсэн Эмират Улсын Абу Даби хотноо тавдугаар сарын 16-18-ны өдрүүдэд жюү жицүгийн “Гранд слам” тэмцээн болж өндөрлөв. Тус “Их дуулга” тэмцээний эмэгтэйчүүдийн  цэнхэр бүсний 62 кг-ын жинд алтан медаль хүртсэн “Шинэсэгэ ХХК”,  “JUMP Mongolia академи”-ийн тамирчин Баасанжаргалын Наранхишигтэй ярилцлаа.

 –АНЭУ-ын Абу Даби хотод болсон жюү жицүгийн “Гранд слам” тэмцээний цэнхэр бүсний ангиллын 62 кг-ын жинд алтан медаль хүртсэнд баяр хүргэе.

    -Маш их баярлалаа. “Абу Даби-2025” их дуулга тэмцээнээс алтан медаль хүртсэндээ баяртай байна.

-Миний дүү өөрийгөө танилцуулахгүй юу. Айлын хэд дэх хүүхэд вэ?

    -Намайг Баасанжаргалын Наранхишиг гэдэг. Би айлын том охин. Доороо гурван хөөрхөн дүүтэй.

-Одоо хэдэн настай. Аль аймаг, хотод төрсөн хүүхэд вэ?

     -Би одоо 20 настай. Улаанбаатар хотод төрсөн.

  -Бага нас нь хаана өнгөрөв, Багад хэр хөдөлгөөнтэй охин байсан бэ?

        -Бага насныхаа багахан хугацааг Говь-Алтай аймагт амьдарч өнгөрүүлсэн. Цаашлаад Эрдэнэт хотод эмээ дээрээ ихэнх хугацаагаа өнгөрүүлсэн. Багадаа ер нь гүйж харайж, дэгдсэн, их хөдөлгөөнтэй хүүхэд байсан.

-Одоо ямар сургуульд сурдаг вэ?

     -Одоо МУБИС-ын Биеийн тамирын сургуулийн “Жамп” хөтөлбөрт Жюү жицүгийн дасгалжуулагчийн ангийн 2-р курсийн оюутан.

-Охин хүүхэд байж яагаад жюү жицүг сонгож хичээллэх болсон юм бэ?

        -Анх аав маань миний охин барилдаад нэг үзэх үү гэж үг цухуйлгаж байсан юм. Тэр үед би юу гэж охин хүүхэд барилдаж байдаг юм. Ичмээр юм гэж бодож байлаа. Аавыг бөхийн тухай ярих болгонд сонирхож, сонсдог байв.  Сүүлдээ ер нь барилдах гээд оролдоод үзье гэж шийдсэн. Тэгээд л анх О.Нарангэрэл багшийн шавь болж жюү жицүгээр хичээллэж эхэлсэн.

 -ОХУ-ын Анна Комоловаг ялж, их дуулгын аварга болжээ. Түүнтэй ямар тактикаар барилдаж ялалт байгуулав аа?

     - “Абу Даби”-гийн “Гранд слам”-ын алтан медалийн төлөө ОХУ-ын тамирчинтай барилдахдаа яг л өөрийнхөө стиллээр тайван барилдсан. Тэгээд ялалтыг авч чадсан.

 -Жюү жицүгийн спортоор хэд дэх жилдээ хичээллэж байгаа вэ?

   -Анх 16 настай байх үедээ эхлэн хичээллэсэн гэхээр, одоо яг дөрвөн жил болж байна.

-Жюү жицүгийн спортоор хичээллэсэн үеэс хойших томоохон амжилтаасаа сонирхуулахгүй юу?

      -2024 оны  Япон Улсын Токио хотод болсон “Tokyo Grand Slam”-аас мөнгөн медаль хүргэж байв. 2023 оны Казахстан Улсын Астана хотод болсон залуучуудын дэлхийн аварга шалгаруулах тэмцээнд шагналт тавдугаар байрт орж байсан. 2025 онд “Абу Даби Grand Slam”-аас алтан медаль хүртлээ.

-Босоо болон хэвтээ барилдаанд гол төлөв ямар мэхнүүдийг сайн хийж үнэлгээ авдаг вэ?

    -Би босоо барилдаан гэхээсээ илүүтэйгээр хэвтээ барилдааныг гол төлөв хийж оноо авдаг. “Lasso spider” “X guard” “Lapel guard” зэрэг байрлалаас барилдах дуртай.

-Хамгийн сайхан сэтгэлдээ хоногшин үлдсэн дурсамжтай барилдааныг хэзээ, ямар тэмцээн дээр хийж байсан бэ?

      -Казахстаны залуучуудын дэлхийн аварга дээр хийсэн барилдаанууд сэтгэлд их хоногшиж үлдсэн. Яагаад гэвэл тэр тэмцээнд би маш их жин хасаж ороод өөрийнхөө төсөөлснөөс илүү сайн барилдаж байсан учраас хамгийн гоё барилдаанууд байсан.

 -Энэ жил ямар, ямар томоохон тэмцээнд оролцохоор төлөвлөж байгаа вэ?

         Энэ 2025 онд зорьж байгаа томоохон тэмцээнүүд бол Азийн аварга, Зүүн Азийн аварга, дэлхийн аварга шалгаруулах тэмцээнүүд байна. Эдгээр тэмцээнд амжилттай оролцох зорилготой байгаа.