Арабын Нэгдсэн Эмират Улсын Аль-Айн хотод шатрын насанд хүрэгчдийн Ази тивийн аварга шалгаруулах тэмцээн энэ сарын 6-16-ны хооронд үргэлжилнэ. Азийн аваргад 34 орны нийт 262 тамирчин өрсөлдөж байна. Харин манай улсаас Үндэсний шигшээ багийн дасгалжуулагч С.Билгүүн, С.Ган-Од нарын удирдлага дор нийт 17 шатарчин өрсөлдсөнөөс эмэгтэйчүүдийн ангилалд “ФИДЕ” дэд мастер Б.Мөнгөнзул мөнгөн медаль хүртлээ.

     Тэрбээр шатрын насанд хүрэгчдийн Ази тивийн аварга шалгаруулах тэмцээнээс мөнгөн медаль хүртсэн Монголын анхны тамирчин болж, эмэгтэй олон улсын мастер цол, эмэгтэйчүүдийн их мастерын нэгдүгээр норм, эрэгтэйчүүдийн олон улсын мастерын нэгдүгээр норм биелүүлж,  дэлхийн цомд оролцох эрхээ авлаа. Дэлхийн цомын эрх олгох тус тэмцээнд их мастер 53, эмэгтэй их мастер 19, олон улсын цолтой 228 шатарчин оролцож байна. Монголын шатарчид Азийн аваргаас өмнө нь хоёр хүрэл медаль хүртсэн бөгөөд 2019 онд Т.Мөнхзул, 2023 онд Б.Мөнгөнтуул нар хүрэл медалийн тавцанд гарч байв.