Чөлөөт бөхийн “U20” ангиллын 2025 оны залуучуудын улсын аварга шалгаруулах тэмцээн тавдугаар сарын 5-6-ны өдрүүдэд Спортын төв ордонд амжилттай зохион байгуулагдаж өндөрлөсөн билээ. Тус УАШТ-ий эмэгтэйчүүдийн 57 кг-ын жинд барилдаж алтан медаль хүртэж, залуучуудын улсын аварга болсон Төв аймгийн БТСГ "Төв-Арж" баг, “Хилчин” спорт хорооны тамирчин Үржингийн Мөнхчимэгтэй ярилцлаа.

-Чөлөөт бөхийн “U20” ангиллын УАШТ-ий 57 кг-ын жинд түрүүлж, алтан медаль хүртсэнд баяр хүргэе.

        -Баярлалаа. “U20” ангиллын залуучуудын УАШТ-д түрүүлсэндээ маш их баяртай байна.

-Миний дүү өөрийгөө танилцуулахгүй юу?

     -Намайг Үржингийн Мөнхчимэг гэдэг. Би Төв аймгийн Өндөрширээт суманд төрсөн. Одоо 18 настай. Дээрээ хоёр ахтай, айлын бага хүүхэд.

-УАШТ-д хэдэн барилдаан хийж түрүүлэв ээ?

  -Энэ удаагийн “U20” ангиллын залуучуудын УАШТ-д дөрвөн барилдаан хийж,  алтан медаль хүртлээ.

-Улсын аваргын алтан медалийн төлөөх барилдаанд Спортын төв сургуулийн Э.Мягмарсүрэнтэй ямар тактикаар барилдаж ялалт авсан бэ?

     -Тэмцээн бүрийн барилдааны өмнө багштайгаа ярилцдаг. Ямар тактикаар барилдахаа асуудаг. Сая болж өнгөрсөн залуучуудын УАШТ дээр багш маань зүгээр сайхан чөлөөтэй элдэв зүйл бодохгүйгээр, өөрийнхөөрөө барилд. Юу ч бодолгүй барилдаандаа төвлөрч, анхааралтай барилдаанаа дуусга гэж хэлсэн.

-Энэ удаагийн УАШТ-ий хамгийн хүч, ширүүн өрсөлдөгч хэн байсан бэ?

      -Манай жингийнхэн бүгд л миний хүчтэй өрсөлдөгчид байдаг. Тийм болохоор сул өрсөлдөгчид гэж байгаагүй.

-Төв аймгийн “Төв-Арж” клубийн Л.Энхбаяр багшийн шавь уу?

       -Миний анхны багш Ганзориг гэдэг хүн бий. 2020 оноос Л.Энхбаяр багш дээрээ бэлтгэл сургалтандаа хамрагдаад явж байгаа.

-“Хилчин” спорт хорооны тамирчин болоод удаж байна уу?

       -Энэ жилийн чөлөөт бөхийн “U20” ангиллын залуучуудын УАШТ-д Төв аймгийн БТСГ-ын "Төв-Арж" баг, “Хилчин” спорт хорооноос орж, барилдаад түрүүлсэн байгаа.

-Чөлөөт бөхийн спортоор хэд дэх жилдээ хичээллэж байгаа вэ?

     -Чөлөөт бөхийн спортоор тав дахь жилдээ хичээллэж байна.

-Бөхийн спортыг сонгож, хичээллэх болсон шалтгаан юу байсан бэ?

      - Бага байхаасаа жүдо бөхийн олимпын аварга Н.Түвшинбаяр ахын барилдааныг их сонирхон, бахархаж үздэг байсан. Тэр үеэс хойш бөхийн спорт их сонирхолтой санагддаг болсон. Хөдөө өсөж торнисон болохоор хөвгүүдтэй их барилддаг байлаа.  Бага байхдаа алчуураа толгой дээрээ намируулан, төрийн далбаа болгож “Би олимпын аварга боллоо” гээд их тоглодог байлаа.

-Чөлөөт бөхөөр хичээллэсэн үеэс хойших томоохон амжилтаасаа сонирхуулахгүй юу?

   -Чөлөөт бөхийн өсвөр үеийн “U15” ангиллын Азийн аварга. Өсвөр үеийн УАШТ-д  гурван удаа түрүүлсэн.  Насанд хүрэгчдийн УАШТ-ий хүрэл медальтай. Хонконгийн олон улсын тэмцээний алт, Япон Улсад болдог “Саори кап” олон улсын тэмцээний алтан медальтай.  Залуучуудын УАШТ-ээс алт, хүрэл медаль хүртэж байсан.

-Насанд хүрэгчдийн УАШТ-д хэдэн онд барилдаж байсан юм бэ?

      -2025 оны чөлөөт бөхийн насанд хүрэгчдийн УАШТ-д анх удаа оролцож, хүрэл медал хүртсэн байгаа.

–Спортын ямар зэрэг, цолтой вэ?

       -Чөлөөт бөхийн Монгол Улсын спортын мастер цолтой.

-Удахгүй манай улсад болох дэлхийн чансааны оноо олгох тэмцээнд барилдах уу?

        -Тийм ээ, дэлхийн чансааны оноо олгох, насанд хүрэгчдийн олон улсын тэмцээний 57 кг-ын жинд барилдана.

-Энэ жил олон улс, тив, дэлхийн ямар тэмцээн уралдаанд оролцохоор төлөвлөж байгаа вэ?

         -Эхний төлөвлөгөө гэвэл багштайгаа зөвлөлдөөд дэлхийн чансааны оноо олгох тэмцээнд оролцохоор болсон. Мөн энэ оны зургадугаар сард Турк Улсад болох олимп, дэлхийн аварга, Туркийн алдарт бөх “Yasar Dogu”-гийн нэрэмжит олон улсын тэмцээнд барилдах төлөвлөгөөтэй байгаа.  Эдгээр тэмцээний дараа багштайгаа ярилцаж  байгаад дараагийн оролцох тэмцээнээ сонгоно.