Самбо бөхийн залуучуудын ДАШТ-ий хошой хүрэл медальт, Ази тивийн аварга, Сарантуяагийн Гүнжинлхам 2000 оны энэ өдөр мэндэлжээ. Тэрбээр Ази тивийн аварга, ААШТ-ий мөнгө, хүрэл медальтай. Залуучуудын дэлхийн аваргын хошой хүрэл медальтай. Азийн аваргаас нэг алт, нэг мөнгө, гурван хүрэл медаль авч байсан.  Дэлхийн тулааны урлагийн наадмын хүрэл медальтай.  Улсын аварга шалгаруулах тэмцээний алт, мөнгө, хүрэл нийлсэн 20 гаруй медальтай юм.

      Самбо бөхийн спортын мастер цолтой. Харин жүдо бөхийн спортын дэд мастер цолтой. 2017 оноос анх самбо, жүдо бөхийн спортод хөл тавьж орсон. С.Гүнжинлхам дунд сургуульд байхдаа дуулж бүжиглэдэг, урлагт их сонирхолтой хүүхэд байсан гэдэг. Ахлах ангид байхдаа нэг өдөр бөхийн заалаар шагайж үзжээ. Бэлтгэл хийж байгаа хүүхдүүдийг хараад, “Би ч гэсэн яагаад энэ хүүхдүүд шиг мундаг болж чадахгүй гэж”  гэсэн бодол төрсөн аж. Тэр цаг үеэс эхлээд бөхийн спортод зүрх сэтгэлээрээ эргэлт буцалтгүй шунан дурласан юм билээ.