Монгол Улсын Ерөнхий сайд, улсын хошой баатар, маршал Х.Чойбалсангийн нэрэмжит улс аймгийн цолтой 128 бөхийн барилдаанд Завхан аймгийн Яруу сумын харьяат, "Хилчин" спорт хороо, Хилийн цэргийн-0208 анги,  “Жем Интернэйшнл” ХХК, "Даян" дэвжээний бөх, улсын заан Мөнхтөрийн Лхагвагэрэл түрүүллээ. Завхан аймгийн Их-Уул сумын харьяат, “Даян дэвжих” групп,  “Даян” дэвжээний бөх, улсын начин Батцэнгэлийн Чимэдвандан үзүүрлэв.

     Шөвгийн дөрөвт Дорнод аймгийн Дашбалбар сумын харьяат, "Аврагч" спорт хороо, “Степ Гоулд” ХХК, “Бүрэн Дуулга” ХХК,  “Цагаан Сор” ХХК, "Дорнын Хүчтэн" дэвжээний бөх, улсын заан Д.Анар, Баянхонгор аймгийн Баянбулаг сумын харьяат, "Хүч" спорт хороо, Цагдаагийн ерөнхий газар, "Мөнхийн үсэг" групп, "Нэгдэл" клуб, “Бадрах-Өглөө” ХХК, "Их Богд" дэвжээний бөх, улсын үнэн зоригт харцага Н.Золбоо нар шалгарлаа.

     Шөвгийн наймд улсын заан Б.Бат-Өлзий, аймгийн хурц арслан Н.Амгаланбаатар, аймгийн арслан Д.Бадаигарав, аймгийн заан Д.Батбаяр нар үлдэв. Зохион байгуулагчдын зүгээс үзэгчдийн дундаас гурван азтан тодруулж, Маршалын хөрөг бүхий хивс, 1 сая төгрөг, хурдан удмын адуу гардуулсан бол түрүү бөх 10 сая, үзүүр бөх 5 сая, дөрөвт үлдсэн бөхчүүд тус бүр 2 сая төгрөгийн бай шагнал гардсан юм.

    Дараагийн долоо хоногийн бямба гараг буюу дөрөвдүгээр сарын 19-ний 13:00 цагаас “Хамбын бор”, “Урт гарт” хэмээх Монгол Улсын хүчит арслан Маамын Лхагвын нэрэмжит улс, аймаг, сумын цолтой хүчит 256 бөхийн барилдаан болно.

МОНГОЛЫН ҮНДЭСНИЙ БӨХИЙН ХОЛБОО