Хүндийн өргөлтийн ОУХМ, ОБЕГ-ын “Аврагч” спорт хорооны тамирчин, Ази тивийн аварга Ганзоригийн Анужин энэ өдөр мэндэлжээ. ОУХМ Г.Анужин 1998 оны энэ өдөр Говь-Алтай аймгийн Баян-Уул суманд төржээ. Тэрбээр хөнгөн атлетикаар хичээллэж байгаад 2013 оноос хүндийн өргөлтийн спортоор хичээллэж эхэлсэн байдаг.

         Анх Тайланд Улсад болсон олон улсын тэмцээнд Монгол Улсын дээд амжилтыг шинэчлэн тогтоож байлаа. 2017 оны хүндийн өргөлтийн насанд хүрэгчдийн УАШТ-ны эмэгтэйчүүдийн 63 кг-д алтан медаль хүртсэн. 2017 онд Тайландын Эзэн хааны нэрэмжит хүндийн өргөлтийн "Дэлхийн цом"-ын нэр хүндтэй тэмцээнээс Г.Анужин 63 кг-д огцом өргөлтөөр 87 кг, түлхэлттэй өргөлтөөр 108 кг өргөж алтан медаль хүртэж байв.

        2023 онд Өмнөд Солонгосын Жэнжүд  болсон хүндийг өргөлтийн насанд хүрэгчдийн Ази тивийн аварга шалгаруулах тэмцээний 64 кг-ын жинд өрсөлдөж Ази тивийн аварга болсон. Тэрбээр огцом болон түлхэлттэй өргөлтийн төрлөөр болон нийлбэр дүнгээр дүнгээр тэргүүлж гурван алтан медалийн эзэн болж байлаа.

      Мөн 2017 онд БНСУ-ын Яангүг хотод болсон хүндийн өргөлтийн Азийн аварга шалгаруулах тэмцээнээс  Г.Анужин хүрэл медаль хүртэж  байсан юм. 2017 оны насанд хүрэгчдийн ДАШТ-д эмэгтэйчүүдийн 63 кг-д Г.Анужин оролцож огцом өргөлтөөр 87 кг, түлхэлттэй өргөлтөөр 106 кг-ыг өргөж, нийлбэр дүнгээр 193 кг-аар “В” хэсэгтээ есдүгээр байр эзэлж байлаа.  2018 онд Польш Улсын Биала Подласка хотод болсон хүндийн өргөлтийн оюутны ДАШТ-ээс 63 кг-ын жинд түлхэлттэй өргөлтөөр мөнгөн медаль хүртсэн. Г.Анужин Монголын оюутны спортын холбооны 2018 оны “Шилдэг оюутан тамирчин” болсон юм.