Гүрж Улсын нийслэл Тбилис хотод Олон улсын жүдо бөхийн холбоо “IJF”-ийн цуврал “Тбилис-2025 Гранд слам” тэмцээн гурван дахь өдөр үргэлжилж өчигдөр өндөрлөв. Тэмцээний сүүлийн өдөр 90 кг-ын жинд Ц.Ган-Эрдэнэ, Б.Мөнхбаяр, -100 кг-ын жинд Б.Хүдэрчулуун, +100 кг-ын жинд Б.Гончигсүрэн, эмэгтэйчүүдийн -78 А.Дуламсүрэн, +78 А.Адъяасүрэн нар барилдлаа. Эмэгтэйчүүдийн -78 кг-ын жинд 18 тамирчин барилдсан. Манай улсаас Айлтгүйбаатарын Дуламсүрэн барилдав. Тэрбээр “С” хэсгийн нэгдүгээр тойрогт ОХУ-ын 18 настай залуу тамирчин Kristina KONOVALOVA-д хожигдсон.

      Эмэгтэйчүүдийн +78 кг-ын жинд 18 тамирчин барилдсан. Манай улсаас тус жинд ОУХМ Амарсайханы Адъяасүрэн барилдлаа. Тэрбээр “D” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт амаргүй өрсөлдөгч, хашир туршлагтай тамирчин Сербийн Milica ZABIC-ийг буулган авсан.  Улмаар “D” хэсгийн аваргын төлөөх барилдаанд Францын  Julia TOLOFUA-д хожигдсон. Дагах тойргийн барилдаанд Италийн Asya TAVANO-д ялагдаж долдугаар байраар тэмцээнээ өндөрлүүллээ.

     Эрэгтэйчүүдийн 90 кг-ын жинд 29 бөх барилдсан. Манай улсаас Цэрэнбатын Ган-Эрдэнэ, Баттогтохын Мөнхбаяр нар барилдсан. Ц.Ган-Эрдэнэ “А” хэсгийн нэгдүгээр тойрогт Нидерландын Mark VAN DIJK-тай ялагдсан байгаа. Б.Мөнхбаяр “D” хэсгийн нэгдүгээр тойрогт Словак Улсын Alex BARTO-той ялсан. Хоёрдугаар тойрогт Бразилын Rafael  MACEDO-д хожигдлоо. Эрэгтэйчүүдийн -100 кг-ын жинд 33 барилдсан. Манай улсаас тус жинд Баярцэнгэлийн Хүдэрчулуун барилдлаа. Тэрбээр “С” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт дэлхийн аварга Кубын Ivan Felipe SILVA MORALES-д ялагдсан.

       Эрэгтэйчүүдийн +100 жинд 18 тамирчин барилдсан. Манай улсаас ОУХМ Батхуягийн Гончигсүрэн анх удаа гранд слам ангиллын тэмцээнд жин өгсөн +100 кг-ын жинд барилдлаа. Тэрбээр “В” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Гүржийн Saba INANEISHVILI-ийг ялсан. Улмаар “В” хэсгийн аваргын төлөөх барилдаанд Узбекистаны Shokhrukhkhon .BAKHTIYOROV-ыг ялсан. Шөвгийн дөрөвт дэлхийн аварга Гүржийн Guram  TUSHISHVILI-д хожигдсон. Хүрэл медалийн төлөөх барилдаанд Нидерландын  Jur SPIJKERS-д ялагдаж шагналт тавдугаар байраар энэ удаагийн “Гранд слам”-ыг өндөрлүүлж байна.