Олон улсын олимпын хороо (ОУОХ)-ны ерөнхийлөгч Томас Бахыг хүндэт ерөнхийлөгчөөр насан турш нь өргөмжлөх шийдвэрийг гаргалаа. Тэрбээр 12 жилийн турш олимпын хөдөлгөөнийг удирдаж ирсэн бөгөөд ирэх зургадугаар сард албан тушаалаа хүлээлгэн өгөхөөр бэлтгэж байна.Энэхүү шийдвэрийг Грекийн өмнөд баруун эргийн Коста Наварино амралтын газарт зохион байгуулсан 144 дэх удаагийн ОУОХ-ны чуулганы эхний өдрийн төгсгөлд зарласан бөгөөд гишүүд санал нэгтэйгээр баталж, алга ташин хүндэтгэл үзүүлэв.

      Томас Бах "Би энэхүү өндөр хүндэтгэлийг маш их даруу байдлаар хүлээн авч байна. Учир нь би үргэлж хэлж ирсэнчлэн өнөөдрийн амжилт бол нэг хүнийх биш, харин бид бүгдийн хамтын хүч хөдөлмөрийн үр дүн юм. Та бүхэн өөр өөрийн хувь нэмрийг оруулсан. Бид олимпын үнэт зүйлсэд үнэнчээр зүтгээгүй бол өнөөдөр энэ хол замыг туулах байсан эсэхийг хэн мэдэх билээ. Тиймээс өнөөдөр надад олгож буй энэхүү хүндэтгэлийг та бүхэндээ зориулж байна. Би олимпын хөдөлгөөнд ажиллах ховорхон боломж тохиосонд үргэлж талархаж ирсэн. Өнгөрсөн 12 жилийг зарим нь хүнд хэцүү, золиос шаардсан гэж хэлж магадгүй. Гэхдээ би өөрийгөө ямар ч золиос гаргасан гэж боддоггүй. Би тамирчны замналаа дуусгасны дараа ч спортоор амьдрах аз завшаан надад тохиосон. Миний олимпын алтан медаль амьдралыг минь өөрчилсөн шиг, ОУОХ-ны ерөнхийлөгчөөр ажиллах хугацаандаа би бусдын амьдралд өөрчлөлт гаргахад нь туслах боломжтой байсан" хэмээн Томас Бах ярьжээ.

     Түүний 12 жилийн хугацаанд үргэлжилсэн бүрэн эрхийн хугацаа энэ оны зургадугаар сарын 23-нд буюу олимпын өдөр албан ёсоор дуусгавар болж, Пүрэв гарагт сонгогдсон шинэ ерөнхийлөгч ОУОХ-ны 10 дахь тэргүүнээр ажиллаж эхэлнэ. Бах ирээдүйн олимпын хөдөлгөөнд итгэлтэй байгаагаа илэрхийлэв. "Би олимпын хөдөлгөөнд бүхий л хүчээ зориулсан гэдгээ чин сэтгэлээсээ хэлж чадна. Одоо шинэ удирдлагыг сонгох цаг ирлээ. Та бүхний сонгох хүн олимпын хөдөлгөөнийг бүр ч гэрэл гэгээтэй ирээдүй рүү чиглүүлэх болно. Учир нь спортод өчигдрийн амжилт бол зөвхөн маргаашийн ялалтын суурь юм" гэж тэр онцоллоо.

      Бах "Өөрчил эсвэл өөрчлөгд" гэсэн зарчмыг баримталж, ОУОХ-нд түүхэн шинэчлэлүүдийг авчирсан гэдгээрээ алдартай. Түүний удирдлага дор олимпын хөтөлбөр 2020 (2014), олимпын хөтөлбөр 2020+5 (2021), олимпын хиймэл оюун ухааны хөтөлбөр (2024) гэсэн гурван стратегийн төлөвлөгөө батлагдаж, олимпын хөдөлгөөн, олимпын наадам, ОУОХ-ны өөрчлөлтийн чигийг тодорхойлсон. Чуулганы үеэр ОУОХ-ны гишүүд олимпын хөтөлбөрийн хэрэгжилтийг эргэн харж, энэ нь олимпын наадам болон ОУОХ-ны зохион байгуулалт, төлөвлөлтөд хэрхэн өөрчлөлт авчирсныг дүгнэв.

     Түүнчлэн, энэхүү шинэчлэлүүдийн үр дүнд тамирчдын эрх, үүрэг эрх мэдэл, жендерийн тэгш байдал, тогтвортой хөгжил, санхүүгийн баталгаат байдал, цахим шилжилтийн 10 үндсэн чиглэлд ахиц гарсныг онцлов.ОУОХ-ны Санхүүгийн хороо дэлхийн эдийн засгийн сорилтуудын дунд ч энэхүү шинэчлэлүүд нь байгууллагын урт хугацааны санхүүгийн тогтвортой байдлыг бэхжүүлж, 2012 оноос хойш арилжааны орлого 60 хувиар өссөнийг мэдээлэв. Одоо Бахын залгамжлагч болох долоон нэр дэвшигч өрсөлдөж байгаа бөгөөд хэдхэн цагийн дараа ОУОХ-ны гишүүд шинэ удирдагчаа тодруулахаар саналаа өгөх гэж байна.