Тэргэнцэртэй сэлэмний спортын тамирчин Дамбийбалжирын Цолмон Дорнод аймгийн Баянтүмэн суманд 1992 оны энэ өдөр мэндэлжээ. Тэрбээр 2019 оноос тэргэнцэртэй сэлэмний спортоор хичээллэж эхэлсэн. Одоо зургаа дахь жилдээ хичээллэж байгаа. Д.Цолмон ер нь багын урлаг, спортод дуртай хүүхэд байжээ. Өмнө нь тэргэнцэртэй марафонд уралддаг байсан юм. 2010 оноос эхлэн тэмцээн уралдаанд орж эхэлсэн. Хамгийн сүүлд 2012 онд Монголын бүх ард түмний XIII их наадмын 800 м-ийн зайн  марафоноос алтан медаль хүртсэн. Харин 2019 онд тэргэнцэртэй сэлэмний анхны тэмцээнээс алтан медаль хүртэж байсан. Тэрнээс хойш нийт 11 алтан медаль хүртсэн. Улсын аварга шалгаруулах тэмцээнд гурван удаа түрүүлж, гурван алтан медаль хүртсэн байгаа. Хамгийн сүүлд Азийн аваргаас хүрэл медаль хүртсэн амжилт гаргаад байгаа юм. Тэрбээр “Wheelchair fencing”-ийн  дасгалжуулагч Мөнхтулга, Гэрэлмаа, хүчний бэлтгэлийн дасгалжуулагч Хүсэлтүвшин нарын удирдлага дор бэлтгэл, сургуулилалтаа хийдэг.