Бөмбөрцөгийн спортыг “Арьсаараа мэдэрч” тайлбарлан үзэгчдийн сэтгэлд хүргэж чаддаг тайлбарлагч бол Сосорбармын Шижирбат билээ. Түүний төрсөн өдөр өнөөдөр тохиож байна. Тэрбээр спортын сэтгүүлч, тайлбарлагч мэргэжилтэй. “Бээжин-2008”, “Лондон-2012”, “Рио-2016”, “Токио-2020”, “Парис-2024” гээд таван олимп дараалан зуны олимпын наадмын жүдо, чөлөөт бөхийн спортыг тайлбарлаж үзэгчдэд хүргээд байгаа.  

        С.Шижирбат 2006 оноос эхлэн тасралтгүй 19 жил тайлбарлагч хийж байна. Чөлөөт бөхийн спортоор багадаа хичээллэж байж, түүний багш нь Москвагийн 1980 оны олимпын хүрэл медальт, Монгол Улсын гавьяат тамирчин,  Дугарсүрэнгийн Оюунболд агсан билээ.

           С.Шижирбат багадаа спортод дур сонирхолтой хүүхэд байсан гэдэг. Бусад хүүхдүүд кино үзэж байхад, харин тэр Орос, Монголын телевизийн  спорт сувгуудын спортын мэдээ, шууд нэвтрүүлгүүд үзээд л сууна. Ямар ч төрлийн спортыг голохгүй үздэг байж. “Таван цагариг” сонинг олон жил уншжээ. 1995-2005 он хүртэлх “Таван цагариг” сонины 10 жилийн бүх дугаар түүнд бий гэсэн.

         Бөмбөрцөгийн бөхийн тайлбарлагч С.Шижирбат “Энийг сонгодог барилдаан гэдэг юм. Үүнийг сонгодог жүдо гэдэг юм үзэгчид ээ. Ямар ч базари байхгүй шүү, Иппон. Бидэнд дуусгаагүй тооцоо байсан шүү дээ... Шүүгчтэй нь яллаа, үзэгчидтэй нь яллаа. "Яавны" яллаа шүү дээ. Ямар азаар бидэнд ийм аварга заяасан юм бэ. Гарцаагүй яллаа, явж дууслаа шүү” гэх зэрэг түүнийг ихэвчлэн хэрэглэдэг үг үнэхээр тренд болсон билээ.