Өмнөд Солонгосын Пёнчан хотод тус улсын гүйлтийн цанын насанд хүрэгчдийн улсын аварга шалгаруулах нээлттэй тэмцээн боллоо. Тус тэмцээнд Монгол Улсаас Үндэсний шигшээ багийн дасгалжуулагч Д.Баттулгын удирдлага дор Б.Ачбадрах, О.Золбаяр, Т.Ариунболд, А.Хүслэн, Б.Номин-Эрдэнэ, А.Энхтуул, Э.Ариунтунгалаг нар өрсөлджээ. Манай тамирчдаас Б.Ачбадрах хоёр зайд алтан медаль хүртэж Өмнөд Солонгосын аварга болсон байна.

       Б.Ачбадрах тэмцээний эрэгтэйчүүдийн сонгомол төрлийн 15 км-ийн зайг 46:07.9 минутад туулснаар түрүүлжээ. Мөн тэшилтийн 30 км-ийн зайг 1:19.05 цагийн амжилтаар туулснаар алтан медаль хүртсэн байна. Тэрбээр өнгөрсөн жилийн тус тэмцээнээс мөнгөн медаль хүртэж байсан бол энэ жил амжилтаа ахиулан хошой алтан медальтан болов.

      Б.Ачбадрах Хятадын Харбин хотод ирэх сарын 7-ны өдөр эхлэх Азийн өвлийн спортын наадамд оролцохоор бэлтгэл сургуулилалтаа хангаж байгаа юм. Түүний хувьд гүйлтийн цанын “Б” зэрэглэлийн ДАШТ-ээс хүрэл медаль хүртсэн Монголын анхны тамирчин билээ.