Чөлөөт бөхийн дэлхийн аварга, "Парис-2024" олимпын тавдугаар байрын шагналт, Ази тивийн аварга, цэргийн дэлхийн аварга, МУГТ Пүрэвдоржийн Орхон 1993 оны  энэ өдөр Өвөрхангай аймгийн Зүүнбаян-Улаан суманд мэндэлжээ. Батлан хамгаалах яам, зэвсэгт хүчний “Алдар” спорт хорооны тамирчин тэрбээр 2017 онд Франц Улсын Парис хотод болсон ДАШТ-ий 63 кг-ын жинд түрүүлж, дэлхийн аварга болсон. 2018 онд Киргизстан Улсын Бишкек хотод болсон Ази тивийн аварга шалгаруулах тэмцээний 62 кг-ын жинд алтан медаль хүртэж Ази тивийн аварга болж байлаа. Харин 2014 онд  Казахстанд болсон Азийн аварга шалгаруулах тэмцээнээс 55 кг-ын жинд мөнгөн медаль хүртэж байв. Мөн түүнчлэн цэргийн дэлхийн аварга болж, Иван Ярыгиний “Алтан гран при” тэмцээнд гурван удаа түрүүлж байсан юм.