МҮОХ-ны “Бөртэ чоно-2024"  оны шилдэгт нэр дэвшигч Монгол Улсын гавьяат тамирчин, Жүдо бөхийн Үндэсний шигшээ баг, “Имперо” групп, "Сүлд" спорт хорооны тамирчин Бавуудоржийн Баасанхүү 1999 оны арваннэгдүгээр сарын 26-ны  Хөвсгөл аймгийн төв Мөрөн хотод төрсөн. Тэрбээр дөрвөн хүүхэдтэй айлын ууган охин.  Анх Хөвсгөл аймгийн Дэлгэрмөрөн цогцолбор сургуулийн биеийн тамирын багш А.Даваадорж, БТСХ-ны багш Б.Очирбат нарын шавь болж самбо бөхөөр хичээллэж эхэлсэн байдаг. Б.Баасанхүү самбо бөхийн залуучуудыг ДАШТ-ий алт, мөнгө, хүрэл медальтай. 2019 онд самбо бөхийн дэлхийн цомын аварга шалгаруулах тэмцээнээс хүрэл медаль хүртэж байсан. 2021 оны есдүгээр сараас эхлэн Жүдо бөхийн Үндэсний шигшээ багийн тамрчин болсон юм.

      2024 он МУГТ Б.Баасанхүүгийн оргил амжилтын жил байлаа. Тэрбээр 2024 онд “Хонконг-2024” Ази тивийн аварга шалгаруулах тэмцээнээс алтан медаль, “Душанбе-2024” их дуулгаас алтан медаль, “Абу Даби-2024” дэлхийн аварга шалгаруулах тэмцээнээс алтан медаль, “Парис-2024” олимпын наадмаас мөнгөн медаль хүртсэн. Нэг жилийн дотор дөрвөн том тэмцээнээс дараалан медаль хүртэнэ гэдэг үнэхээр гайхамшигтай том амжилт билээ.

“АБУ ДАБИ-2024” ДЭЛХИЙН АВАРГА

     Б.Баасанхүү 2024 оны ДАШТ-ий 48 кг-ын жингийн "D" хэсэгт эхний тойрогт гоц мөргөж ялалт авсан. Шигшээ 32-т АНУ-ын Мариа Селиа Лабордег, шигшээ 16-д Израилийн Шира Ришониг, шөвгийн наймд Португалийн Катарина Коштаг тус тус ялсан. Улмаар хагас шигшээ барилдаанд Казахстаны Абиба Абужакыноваг ялж шигшээд шалгарсан. Шигшээ барилдаанд Италийн Ассунта Скуттог цаг дуусахаас долоон секундын өмнө базари үнэлгээгээр ялж дэхийн аварга болсон билээ.

“ПАРИС- 2024” ОЛИМПЫН НААДАМ

     Б.Баасанхүү гавьяат “Парис-2024” олимпын наадмын 48 кг-ын жингийн “C” хэсгийн нэгдүгээр тойрогт  Мальтийн Е.Катринатай учраа таарч цэвэр ялсан. Хоёрдугаар тойрогт Австрийн Кетрингийг цэвэр ялж, “С” хэсгийн аваргын төлөөх барилдаанд Парагвайн Нарваез Габриелатай барилдаж өчих мэхээр цэвэр ялсан юм. Улмаар зооны аваргын төлөө Испанийн Мартинез Абелендатай барилдаж нэмэлт цагт ялалт байгуулсан.

     Б.Баасанхүү олимпын алтан медалийн төлөө дэлхийн гурван удаагийн аварга, "Ханжоу-2022” Азийн наадмын аварга, Нацуми Цунадотой өрсөлдөж, түүний жийж давуулах мэхэнд базари үнэлгээ алдаж, "Парис-2024" олимпын наадмын мөнгөн медальтан болсон. Ийнхүү Б.Баасанхүү олимпын мөнгөн медаль хүртсэн Монгол Улсын 12 дахь тамирчин, жүдо бөхийн спортын тав дахь мөнгө, түүн дотроо эмэгтэй  жүдочдын олимпын мөнгөн медальтай хоёр дахь бөх болсон билээ.