Монголын хэт холын зайн марафон гүйлтийн тамирчин Отгонбаярын Маргад-Эрдэнэ 2024 оны арванхоёрдугаар сарын 10-ны өдөр ОУХМ-ын үнэмлэх, тэмдгээ гардан авсан юм. ОУХМ О.Маргад-Эрдэнэтэй цөөн хором ярилцлаа.

-Хэт холын зайн марафон гүйлтийн ОУХМ цол хүртсэнд баяр хүргэе.

        -Баярлалаа танд

-Ямар амжилтуудын үр дүнд энэ цолны болзолыг хангав?

     -2024 оны наймдугаар сарын 10-11-ний өдрүүдэд болсон хэт холын марафон гүйлтийн улсын аварга шалгаруулах тэмцээний 12 цагийн гүйлтийн тэмцээнд оролцож түрүүлсэн юм. 12 цагийн дотор 132 км замыг туулж ОУХМ болзол хангасан байгаа.

 -Манай уншигчдад өөрийгөө танилцуулахгүй юу?

      -Намайг Отгонбаярын Маргад-Эрдэнэ гэдэг. Тогооч мэргэжилтэй. “SKOL” ресторанд ерөнхий тогоочоор ажилладаг. Одоо эхнэр дөрвөн хүүхдийн хамт амьдардаг. Өндөр уулын спорт сонирхдог. Мөн муатай боксоор хичээллэдэг.

-Одоо ямар клубийн тамирчин бэ?

    -А.Гантулга багшийн удирдлага дор “Хурд” гүйлтийн клуб дээр бэлтгэл, сургуулилалтаа хийж байгаа.

–Марафон гүйлтээр хичээллээд хэдэн жил болж байгаа вэ?

       -Гүйлтийн спортоор хичээллэж эхлээд гурван жил болж байгаа. 2022 оноос хойш тогтмол гүйж байна даа.

 -Анх гүйж эхлэх үедээ шантарч, мохох үе гарч байсан уу?

    –Шантарч мохох үедээ хүүхдүүдээ бодоод эрч хүч авдаг. Би тэдэндээ үлгэрлэж, үлгэр жишээ болох ёстой. Тийм болохоор алиаваа зүйлд хугарч, нугараад байхыг боддоггүй. Тэмцэж, өөрийгөө ялан дийлэхийн тулд сэтгэлээ хурцалдаг.

-Спортоор хичээллэх зорилгодоо хүрэхийн тулд цаг зав, гүйх бэлтгэл хийх орчин хэрхэн бий болгож байв?

     -Өглөө хүүхдээ цэцэрлэгт нь хүргэж өгөөд л шууд бэлтгэлдээ гардаг. Бэлтгэлээ дуусаад усанд орчихоод л эргээд ажилдаа явдаг. Би ер нь маш завгүй амьдардаг хүн дээ. Тэмцээн  ойртсон үед бол эрчимтэй бэлтгэлээ хийдэг. Өдөрт 40 км гүйх гэх мэтээр ачааллаа нэмэгдүүлсэн, өндөр эрчимтэй бэлтгэл хийдэг юм.

-Өөрийнхөө гаргасан амжилтуудыг танилцуулахгүй?

       -2024 онд “Бага Хангай марафон”-ын 100 км-ийн зайн гүйлтэд дөрөвдүгээр байр эзэлсэн. “Шири Чинмой” нэрэмжит марафоны зургаан цагийн гүйлтийн төрөлд оролцож, 74 км замыг туулан гүйж түрүүлж байлаа. Мөн “Arc ekiden” багийн гүйлтийн тэмцээнд гуравдугаар байрт орсон. Хэт холын марафон гүйлтийн улсын аварга шалгаруулах тэмцээний 12 цагийн гүйлтийн төрөлд өөрийн насны ангилалд түрүүлж, 132 км замыг туулан гүйж ОУХМ-ийн болзол хангасан.  Үүнээс гадна тулааны спорт ушу-сандагийн УАШТ-ээс мөнгөн медаль, муатай боксын Зүүн Азийн аварга шалгаруулах тэмцээний 67 кг-ын жингийн хүрэл медальтай. Харин хүүхэд байхдаа хөл бөмбөг тоглодог байлаа. Тэр үед Унгар Улсын өсвөр үеийн аварга шалгаруулах тэмцээнээс мөнгөн медаль хүртэж байсан.

-Холын зайд гүйхийн аз жаргал, сэтгэл ханамж юу байдаг вэ?

    -Өөрийгөө илүү сайн таньж мэддэг. Өөрт байгаа дотоод нөөц, боломж, эрч хүчийг олж, нээж, бүрэн дайчлан ашиглаж байгаа нь аз жаргалыг илүү ихээр мэдрүүлдэг юм.  Тэмцээнд оролцохоос илүүтэй тэмцээнд зориулж бэлтгэл хийх нь маш сонирхолтой санагддаг.