2004 оны энэ өдөр чөлөөт бөхийн “U23” насны Ази тивийн аварга шалгаруулах тэмцээний мөнгөн медаль, Төмөрбаатарын Дэмчигдорж Өвөрхангай аймгийн Тарагт суманд мэндэлжээ. Тэрбээр зэвсэгт хүчний "Алдар" спорт хороон дээр МУГД Ц.Хосбаяр, МУГТ Б.Одончимэг, МУГТ Г.Мандахнаран нарын удирдлага дор бэлтгэл, сургуулилалтаа хийдэг.

       Т.Дэмчигдорж багадаа хөдөө өвөө эмээ дээрээ өссөн юм билээ. Тэрбээр бага байхдаа их хөдөлгөөнтэй, сахилгагүй хүүхэд байсан гэдэг. Ер нь спортод сонирхолтой байж. Сагсан бөмбөг, шатар гээд спортын төрлийг сонирхон хичээллэж байсан аж. Түүнийг аав нь бөх болгоно гэж ярьдаг байжээ. Ангийн хүүхэд чөлөөт бөхийн дугуйланд хамт явах уу гэжээ. Тэгээд л тэр найзыгаа дагаад чөлөөт бөхөөр анх хичээллэж эхэлсэн юм билээ. Одоо тэр чөлөөт бөхийн спортоор зургаа дахь жилдээ хичээллэж байгаа.

      Т.Дэмчигдорж өсвөр үе, залуучуудын “U23” насны улсын аваргад түрүүлж байсан. Мөн насанд хүрэгчдийн улсын аварга шалгаруулах тэмцээнээс гурван хүрэл медаль хүртээд байгаа. ОХУ-ын Сахагийн Якут хотод болдог олимп, дэлхийн аварга Роман Дмитриевийн нэрэмжит тэмцээний мөнгөн медальтай. Түүнчлэн ОХУ-ын Буриадын Улаан-Үд хотод болдог Буриадын ерөнхийлөгчийн нэрэмжит “Байкал-Опен” тэмцээнээс хүрэл медаль хүртэж байсан.