БХЯ-ны зэвсэг хүчний “Алдар” спорт хороо, БГД, “Аваргууд академи”-ийн дасгалжуулагч, ДАШТ-ий хүрэл медальт, Ази тивийн аварга, Азийн наадмын аварга,  МУГТ,  Цэрэнбаатарын Цогтбаяр 1971 оны энэ өдөр мэндэлжээ.

       МУГТ Ц.Цогтбаяр 1990-ээд оны үед хэвтээ барилдааны ур чадвар, арга барил техникээр 57 кг-ын жиндээ Монголдоо төдийгүй дэлхийд гайхагдаж явсан шилдэг тамирчин байлаа.  “Барселон-1992” олимпод Ц.Цогтбаяр төрсөн ах нар болох Ц.Хосбаяр, Ц.Энхбаяр нарын хамт зодоглосон ховорхон амжилтын эзэн. Нэг спортын төрөлд ах дүү гурав хамтдаа оролцсон нь Монголын чөлөөт бөхийн спортод төдийгүй дэлхийн спортын түүхэнд  шинэ түүхийн хуудас бичиж, өдгөө ч бахархал болон дуурсагдаж байгаа билээ.

        МУГТ Ц.Цогтбаяр 1991 онд  ДАШТ-д  шагналт тавдугаар байрт шалгарсан.  “Барселон-1992”  олимпын наадамд аравдугаар байр, Канад Улсын Торонто хотод 1993 онд болсон ДАШТ-ээс хүрэл медаль хүртсэн.  АНУ-ын Атланта хотод 1995 онд болсон ДАШТ-д дөрөвдүгээр байр,  “Атланта-1996”  олимпын наадамд аравдугаар  байрт шалгарч байв.  Япон Улсын Хирошимо хотод болсон Азийн наадмаас алтан медаль, Тайландын  Бангкокын Азийн наадмаас хүрэл медаль, Ази тивийн аваргаас алт, мөнгөн медаль авч байлаа. Чөлөөт бөхийн Монгол Улсын аварга шалгаруулах тэмцээнд  найман удаа түрүүлж байсан юм.

          Ц.Цогтбаяр багш дасгалжуулагчийн ажлын гараагаа 2000 оноос өөрийн төрсөн ах МУГД Ц.Хосбаярын хамт “Алдар” спорт хорооноос эхэлж өнөөг хүртэл дасгалжуулагчийн ажлаа  хийсээр явна. Энэ хугацаанд Ц.Хосбаяр, Ц.Цогтбаяр багшийн шавь нар чөлөөт бөхийн дэлхийн аварга шалгаруулах тэмцээнээс хоё алт, хоёр мөнгө, гурван хүрэл медаль хүртжээ. Өнөөдөр ДАШТ-ээс МУГТ С.Цэрэнчимэд мөнгөн медаль хүртэж Ц.Цогтбаяр багшийнхаа төрсөн өдөрт том бэлэг бариад байна. Одоо ДАШТ-ий хүрэл медалийн төлөө ОУХМ  Ц.Цогбадрах барилдах гэж байгаа.