Казахстан Улсын Шымкент хотод шатрын эмэгтэйчүүдийн 2024-2025 оны цуврал гран при тэмцээн аравдугаар сарын 30-аас арваннэгдүгээр сарын 9-ний өдрүүдэд болох гэж байна. Тус гран прид шилдэг арван шатарчин тойргоор өрсөлдөх юм. Нийт зургаан цуврал тэмцээний үр дүнгээр гран при тэмцээний цомын эзнийг тодруулна.  Нэг тамирчин гуравт нь оролцох эрхтэй.

        Манай улсаас их мастер, гавьяат тамирчин, Үндэсний шигшээ багийн тамирчин Батхуягийн Мөнгөнтуул өрсөлдөх бөгөөд тэрбээр өмнө нь хоёр (2009-2010, 2011-2012) цуврал тэмцээнд оролцохдоо зургаа болон наймдугаар байрт орж байв.

       Харин Монголоос тус тэмцээнд хамгийн өндөр амжилт үзүүлсэн тамирчин нь их мастер, гавьяат тамирчин Т.Батчимэг, тэр 2012-2013 оны цувралд тавдугаар байр эзэлж байлаа. Б.Мөнгөнтуул гавьяат “ФИДЕ” гранд свисс тэмцээнд дөрөвдүгээр байр эзлэн энэ жилийн гран прид оролцох эрхээ авсан байна.