ОУОХ-ны гишүүн, МҮОХ-ны ерөнхийлөгч Б. Баттүшиг, МҮОХ-ны ЕНБД Э. Бадар-Ууган нар  "Улаанбаатар 2024" анхдугаар боксын дэлхийн цомыг зохион байгуулж буй Дэлхийн боксын холбоо /ДБХ/-ны ерөнхийлөгч Борис Ван Дэ Ворстыг хүлээн авч, боксын спортын хөгжлийн тухай санал солилцов.

     Олон улсын олимпын хороо /ОУОХ/-ны ажлын хэсгийн бүрэлдэхүүн нь "Токио 2020", "Парис 2024" олимпын наадмын боксын спортын тэмцээн уралдааныг хариуцан зохион байгуулсан бөгөөд цаашид буюу "Лос Анжелес 2028" олимпын наадмаас эхлэн боксын тэмцээнийг ОУОХ-ноос хариуцан зохион байгуулах боломжгүй гэдгээ албан ёсоор мэдэгдсэнээр олимпын хөтөлбөрт боксын спорт үлдэх эсэх асуудал тамирчид төдийгүй боксын спортыг сонирхогчдын анхаарлын төвд байгаа билээ.

      Дэлхийн боксын холбоо нь аль болох богино хугацаанд ОУОХ-ны гишүүнчлэлийн шалгуур үзүүлэлтийг хангах, дүрмийн нийцэл, боксийн спортыг Олимпын төрлийн спорт хэвээр үлдээж тамирчдын эрх ашгийг хамгаалах болон улс орнуудын Үндэсний олимпын хороод, үндэсний боксын холбоодтой гишүүнчлэлийн талаар хамтын ажиллагааг өргөжүүлэх чиглэлээр эрчимтэй ажиллах шаардлага тулгараад байгаа. 

        Энэ талаар ДБХ-ны Ерөнхийлөгч Борис дурьдав. Азийн орнуудаас Монгол улс хамгийн анхны ДБХ-ны гишүүн орон болсонд дахин талархал илэрхийлээд, ДБХ-ны үйл ажиллагааг дэмжиж маш ойр ажилладаг нь анхны боксын Дэлхийн цомыг Улаанбаатар хотноо хийхэд нөлөөлснийг мэдэгдэж, цаашид боксын спортыг хөгжүүлэх, хүний нөөцийг чадавхжуулах болон бусад олон талт чиглэлээр хамтран ажиллахаа илэрхийллээ.  Одоогийн байдлаар 40 гаруй орон ДБХ-ны бүрэн гишүүнчлэлтэй болсон бөгөөд 20 гаруй орны хүсэлтийг судалж байгаа ажээ.