Хүндийн өргөлтийн насанд хүрэгчдийн Ази тивийн цомын аваргын тэмцээний хүрэл медальт, пауэрлифтингийн ОУХМ Сүрэнжавын Баярбаттай ярилцлаа.

-Та 2012 онд Азийн цомын аварга шалгаруулах тэмцээнд оролцож, хүрэл медаль хүртэхдээ хэдэн кг-ын жинд оролцож байсан бэ?

     -Ази тивийн цомын аварга шалгаруулах тэмцээнд 62 кг-ын жинд оролцож, хүрэл медаль хүртэж байсан. Манай жингийн алтан медалийг Хятадын тамирчин, мөнгөн медалийг манай улсын 62 кг-ын жингийн нэгдүгээр бичигддэг Э.Мөнхдөл хүртэж байлаа. Харин шагналт дөрөвдүгээр байрт Узбекистан Улсын тамирчин орж байсан юм.

-Азийн цомын тэмцээнд өмнөх амжилтаа ахиулж чадсан уу?

      -Ер нь тэр Азийн цомын тэмцээнд бэлтгэл жаахан уналттай орсон. Өдөрт хоёр бэлтгэлтэй явж байгаад тэмцээн болохоос долоо хоногийн өмнө эрчмийг нь бууруулсан болохоор ядаргаа ихтэй байлаа. Сэргэлт бүрэн авч чадалгүй л тэмцээнд орсон юм. Жирийн үед бэлтгэл дээр өргөдөг амжилтаа л давтсан. Амжилтаа ахиулж чадаагүй нь жаахан тоогүй зүйл болсон. Чамлалттай, тааруухан л оролцсон гэж боддог. Гэхдээ яах вэ. Хүрэл медаль хүртсэндээ баяртай байдаг.

-Азийн цомын тэмцээнд хэдэн кг-ыг өргөж байв?

    -Өө тааруухан өргөсөн дөө. Огцмоор 87 кг, түлхэлтээр 119 кг-ыг өргөсөн.

-Хүндийн өргөлтөөр хэдэн жил хичээллэсэн бэ. Анхны багш чинь хэн бэ?

-Хүндийн өргөлтийн спортоор 2004 оноос хойш хичээллэсэн. Надад хүндийн өргөлтийн анхны “А” үсгийг зааж өгсөн багш гэвэл Дархан хотын хүндийн өргөлтийн дасгалжуулагч агсан Цэцэгээгийн Амар багш байгаа юм. Миний хоёр дахь багш гэвэл М.Сэлэнгэбаатар. Мөн Улсын шигшээ багийн дасгалжуулагч Энэбиш багш бий. Энэ гурван багшийн гараар л дамжиж өдий зэрэгт хүрсэн.

-Дарханы өсвөрийн охид улсын аварга шалгаруулах тэмцээнд тогтмол өндөр амжилт гаргадаг. Харин хүндийн өргөлтөөр хичээллэдэг хөвгүүдийн тоо  багассан юм уу даа?

       -Ер нь Дарханы хүндийн өргөлтийн тамирчид УАШТ-д маш сайн амжилт гаргадаг байсан. УАШТ-д Дарханы өсвөр үе, залуучуудын баг гурван удаа дараалан түрүүлж байсан үе бий.  Харин үүнд нь аймаг, орон нутаг, БТСХ төдийлөн анхаарал хандуулахгүй байгаа юм шиг харагддаг. Хуучин спортын ордны тамирчдын бэлтгэл хийх орчин нөхцөл тааруу байсан. Заал танхимыг багасгасан явдлаас болж хүндийн өргөлтөөр хичээллэх хүүхэд, залуусын тоо цөөрсөн. Тийм хүнд хэцүү нөхцөлд М.Сэлэнгэбаатар багш Дарханы тамирчдын залгамж халаа болсон өсвөрийн охидыг Азийн түвшинд хүртэл бэлтгэж чадсан нь гайхалтай том амжилт юм. Сэлэнгээ багшийн шавь охид Монголдоо дээгүүр өрсөлдөөн өрнүүлдэг. 2012 онд болсон Азийн цомын аварга шалгаруулах тэмцээнд нэг охин нь түрүүлж,  хоёр охин нь мөнгөн медаль хүртэж байлаа. Энэ бол үнэхээр гайхамшигтай том амжилт шүү.

-Аймаг орон нутаг, БТСГ-аас яагаад энэ спортыг дэмждэггүй юм бол?

     -Бэлтгэл хийх үед хүнд штангийг шал руу байнга шиддэг болохоор хичээл сургалт явуулах заал танхим олддоггүй байх л даа. Дарханы хүндийн өргөлтийн бэлтгэлийн хуучин танхимыг дундуур нь хувааж машины гарааш болгож, үлдсэн хэсгийг нь чөлөөт бөхийн заал болгочихсон.  Тэгээд агуулахын жижиг өрөө хуваарилсан байдаг.  Тэр хонгилын жижиг өрөө нь цонх, салхивч гэж бараг л  байхгүй. Гурван тамирчин арай ядан багтаж бэлтгэл хийх хэмжээтэй. Ийм жижиг өрөөнд агаарын солилцоо байхгүй газарт Сэлэнгээ багш ажиллаж байсан. Дархандаа энэ спортыг хөгжүүлье гэсэн хүсэл тэмүүллээр, энэ спортод дур сонирхолтой тулдаа л өөрийн амьдрал, эрүүл мэндийг золиослон ажилладаг байх. Тэр битгий хэл, багшийг намын харьялалаас нь шалтгаалж, ажлаас нь халж байсан үе хүртэл бий.

-Дарханы хүндийн өргөлтийн секц  БТСГ-аас тусдаа клуб байгуулаад гарч болдоггүй юм уу?

      -Болох нь ч болох байх л даа. Маш их хөрөнгө мөнгө шаардлагатай болно. Дасгалжуулагчийн нийгмийн асуудал,  цалин, байр, заал танхим, штанг хэрэгсэл гээд хэцүү. Техник хэрэгсэл, ком штанг нь БТСХ-ны мэдэлд байдаг болохоор асуудал гарна л даа.