Францын нийслэл Парис хотод зохион байгуулагдсан зуны олимпын 33 дахь удаагийн наадам өндөрлөлөө. Олимпын буухиа АНУ-аар үргэлжлэх юм. Олимпын далбаа Калифорни мужийн Лос Анжелес хотод ирсэн байна. АНУ зуны олимпын наадмыг тав дахь удаагаа зохион байгуулна. 2024 оны зуны Олимпын 33 дахь удаагийн наадмыг зохион байгуулах өрсөлдөөнд Парис болон Лос-Анжелес хотууд үлдсэн байсан. Олон улсын олимпын хорооны шийдвэрээр 2024 оны зуны олимпыг зохион байгуулах эрхийг Парист өгч, харин Лос Анжелес хотод 2028 оны зуны олимпын 34 дэх удаагийн наадмыг зохион байгуулах эрхийг өгсөн юм.

         Парисын зуны олимпын наадам өндөрлөж, хаалтын үйл ажиллагаагаа хийсний дараа тамирчид эх орон руугаа буцаж байна. Уламжлал ёсоор олимпын наадмын бэлгэ тэмдэг болсон таван цагариг бүхий далбаа Парисыг орхиж, дараагийн наадмыг зохион байгуулах АНУ-ын Калифорни мужийн Лос-Анжелес хотод ирлээ. Ийнхүү Лос-Анжелес хотынхон олимпын буухиаг үргэлжлүүлж байна.

         Америкийн гимнастикч, олимпын 11 медалийг эх орондоо авчирсан алдарт тамирчин Симон Байлс, Лос-Анжелес хотын дарга Карен Бассын хамт олимпын далбааг хүлээж авчээ. Парисын зуны олимпыг АНУ нийт 126 медальтайгаар тэргүүлсэн бол БНХАУ 91 медальтайгаар хоёрдугаарт бичигджээ. 2028 оны олимп АНУ-ын түүхэн дэх тав удаагийн зуны олимпын наадам байх болно. Өвлийн олимпыг оролцуулбал нийтдээ ес дэх удаагийн олимпын наадмыг америкчууд зохион байгуулах гэж байна.

        Лос-Анжелес хот дөрвөн сая орчим хүн амтай, Америкийн кино зах зээл, энтертайнмент шоу үйлдвэрлэлий гол төв. Дэлхийн кино зах зээлийн төв Холливуд Лос-Анжелест байдаг учраас дэлхийн хамгийн том кино үйлдвэрлэгчид энд үйл ажиллагаагаа явуулдаг. Тиймээс 2028 оны зуны олимп сонирхолтой шоу үзүүлбэрүүдээр дүүрэн байх болов уу гэсэн хүлээлт байна. Зарим ажиглагчийн таамаглаж байгаагаар 2028 оны зуны олимпыг зохион байгуулахад Лос-Анжелес хотынхны өмнө тээврийн салбарт томоохон сорилт тулгарч болзошгүй юм. Магадгүй наадмын зохион байгуулагчид 34 дэх удаагийн олимпыг автомашингүйгээр зохион байгуулах байх гэж Өмнөд Калифорнийн их сургуулийн професор, нийтийн тээврийн хэрэгслийн хөдөлгөөний судлаач Жэймс Мур таамаглал дэвшүүлсэн байна.

         Парис дахь цэнгэлдэх хүрээлэнгээс олимпын далбааг Холливудын од, “Биелэгдэшгүй даалгавар” цуврал кино бүтээлийн од алдарт жүжигчин Том Крюз олимпын далбааг хүлээж авсан. Тэрбээр олсоор цэнгэлдэх хүрээлэнд бууж, мотоциклоор далбааг авч явсан нь олон хүний сэтгэлийг хөдөлгөж, Лос-Анжелесын олимпын наадам гайхалтай болох байх гэсэн хүлээлтийг төрүүлсэн. Парисын олимпын хаалтыг ажиллагааг 71.500 орчим хүн үзэж сонирхсон. Харин одоо паралимпын наадам наймдугаар сарын 28-ны өдрөөс есдүгээр сарын 8-ны өдөр хүртэл Парист үргэлжилнэ.