Сонирхогчдын боксын насанд хүрэгчдийн эмэгтэйчүүдийн дэлхийн аварга шалгаруулах тэмцээний мөнгөн медальт, Боксын Үндэсний шигшээ баг, “Аврагч” спорт хорооны тамирчин, ОУХМ Лутсайханы Алтанцэцэг 1995 оны энэ өдөр мэндэлжээ.

         Тэрбээр 2023 оны гуравдугаар сарын 15-26-ны өдрүүдэд Энэтхэг Улсын нийслэл Шинэ Дели хотын “Jadhav Indoor Hall” спорт цогцолборт болсон эмэгтэй боксчдын ДАШТ-ий 48 кг-ын жинд Энэтхэгийн Ниту Гангастай тэнцүүхэн тулаан хийсэн юм. ДАШТ-ий зохион байгуулагч орны тамирчны талд шүүгчид илүүтэйгээр шүүчихсэн тал бий.

        ОУХМ Л.Алтанцэцэг ДАШТ-ий хүрэл медалийн төлөөх тулаанд Узбекистаны Ф.Фозиловаг 5:0-ээр илүүрхэн ялсан. Улмаар мөнгөн медалийн төлөөх тулаанд Мароккогийн Моуттаки Ясминыг буулган авсан юм. Харин алтан медалийн төлөөх тулаанд дэвжээний эзэн орны боксчинд шүүгчдийн саналаар хожигдсон. Ийнхүү Л.Алтанцэцэг Монголын эмэгтэй боксчдоос ДАШТ-ээс мөнгөн медаль хүртсэн анхны тамирчин болж, нэрээ түүхэнд мөнхөлсөн юм.