Бөхийн төрлүүдийн “U23” насны Ази тивийн аварга шалгаруулах тэмцээн энэ сарын 27-ны өдөр Йордан Улсын нийслэл Амман хотод эхлээд байна. Тэмцээний хоёр дахь өдөр эмэгтэйчүүдийн 50, 55, 59, 68,76 кг-ын барилдаанууд явагдаж манай тамирчин Баянмөнхийн Отгонтуяа 55 кг-ын жинд алтан медаль хүртэж, Амманы тэнгэрт Монгол Улсынхаа төрийн дууллыг эгшиглүүлсэн байна.

     Түүний жинд зургаан тамирчин хүч үзсэн бөгөөд манай тамирчин хэсэгтээ эхний барилдааныг Казахстаны бөх Айнур Ашимоватай хийж 8:4-ийн харьцаатай ялж, дараа нь Тайванийн тамирчныг 5:0-ээр хагас шигшээд Киргизстаны Арууке Кадирбек Кызыг 6:1-ийн харьцаатай ялснаар финалд шалгарчээ.

     Улмаар аваргын алтан медалийн төлөө Энэтхэгийн тамирчин Сито Ситог 7:1-ийн харьцаатай ялж “U23” насанд Ази тивийн хошой аварга болжээ. Тэрбээр 2022 онд энэ тэмцээнээс анхны түрүүгээ авч байсан юм. Энэ амжилтаараа Б.Отгонтуяа нь “U2”3 насны ангилалд Ази тивээс хос алтан медаль хүртсэн Монголын чөлөөт бөхийн анхны тамирчин болж байгаа юм.