МҮОХ, Монгол-Францын төвтэй байгуулсан харилцан ойлголцлын санамж бичгийн хүрээнд 2024 оны олимпын өдөрт зориулж Франц үндэсний спорт болох петанкийн тэмцээнийг Үндэсний цэцэрлэгт хүрээлэнд зохион байгууллаа. Тус тэмцээнийг Франц Улсын засгийн газрын санхүүжилтээр байгуулсан петанкийн зориулалтын талбай дээр зохион байгуулж, талбайн нээлтийн үйл ажиллагаа болов.

      Тэмцээнд олимпын хөдөлгөөнийг өөрийн аймаг дүүрэгтээ идэвхи зүтгэлтэй сурталчилдаг шилдэг найман олимпын зөвлөл оролцсоноос III байрт Налайх дүүргийн “Лиллехаммер” олимпын зөвлөлийн тамирчид, II байрт Баянзүрх дүүргийн “Нагано” олимпын зөвлөлийн баг тамирчид, тэргүүн байрт Хөвсгөл аймгийн “Сидней” олимпын зөвлөлийн баг тамирчид тус тус байр эзэллээ.

      Мөн “Парис-2024” сэдэвт комик номын уралдааны ялагч нарыг шалгарууллаа. Уг уралдаанд Төв аймгийн Алтанбулаг сумын ЕБС-ын 10-ын “А” ангийн сурагч Б. Идэрмөнх III байр, “Шинэ-Үе” ахлах сургуулийн 8-ын “Б” ангийн сурагч Б. Баярцэлмүүн II байр, Төв аймаг, Зуун мод сумын 5-р сургуулийн 9-ийн “Б” ангийн сурагч О.Ганчимэг тэргүүн байрт тус тус шалгарлаа.

      Энэхүү тэмцээний нээлтэд Монгол-Францын төвийн захирал Николас Пубилл Майнали болон МҮОХ-ны тэргүүн дэд ерөнхийлөгч Ч.Наранбаатар нар оролцов. Парисын олимпын наадмыг угтаж олимпизмыг хөгжүүлэх сургалт сурталчилгаа өрнүүлэх, Олимпын өдрийг хамтран зохион байгуулах, ОУОХ-ны үндсэн хэл болох Франц хэлний анхан шатны мэдлэгийг баг тамирчид, олон нийт, хүүхэд залууст олгох, тус улсын түүх, соёлыг түгээн дэлгэрүүлэх чиглэлээр хамтран ажиллаж байгаа билээ.