Насанд хүрэгчдийн эмэгтэйчүүдийн дэлхийн аварга шалгаруулах тэмцээний хүрэл медальт, “Алдар” спорт хороо, Агаарын цэргийн 065 дугаар ангийн тамирчин,  ОУХМ Мөнхцэцэгийн Энхжаргал “Парис 2024” олимпын наадамд оролцох боксчдын хоёр дахь эрхийг хүртсэн билээ. Тэрбээр 2021 оны “U22” хүртэлх насны Ази тивийн аварга, 2022 оны дэлхийн цомын аварга,  2023 оны боксын эмэгтэйчүүдийн насанд хүрэгчдийн ДАШТ-ий хүрэл медальтай манай улсын шилдэг эмэгтэй боксчдын нэгэн юм.

      “Парис 2024” зуны олимпод оролцох эрхийн эзэн ОУХМ М.Энхжаргал Тайландын Бангкок хотод есөн өдрийн турш үргэлжилсэн "2024 World Boxing Olympic Qualification Tournament 2" олимпын эрх олгох боксын сүүлийн тэмцээний 54 кг-ын жинд тулалдсан. Тус тэмцээний нэгдүгээр тойргийн тулаанд ОУХМ М.Энхжаргал  Япон Улсын тамирчин Микото Харадаг хажуугийн шүүгчдийн санал нэгтэй шийдвэрээр ялсанаар олимпын эрх олгох тэмцээний эхний ялалтаа авсан. Хоёрдугаар тойрогт Канадын боксчин Скарлетт Делгадог буулган авсан юм. Гуравдугаар тойргийн тулаанд Венесуэлийн хүчтэй өрсөлдөгч Йохана Гомезыг 3:2-оор ялж, олимпын эрхийг хүртсэн.

       Харин ОУХМ М.Энхжаргал 2023 оны насанд хүрэгчдийн ДАШТ-ий нэгдүгээр тойрогт  Вьетнамын Thi Kim Anh-тай эхний хоёр үед их л эгзэгтэй, сэтгэл догдлуулсан тулаан хийж байлаа. Гуравдугаар үеийн тулаанд түүнийг илт илүүрхэн, хүнд цохилтод оруулан тоолуулж, 5:0-ээр буулган авч байв. Тэрбээр Вьетнамын боксчинтой тулааны эхний үед, өрсөлдөгч тамирчнаа тандаж, судлах зорилготой тулааныг хийж, сүүлийн хоёр үед тухайн тамирчны арга барилд тааруулсан тулааныг хийхийг хичээсэн гэдэг. Багш, дасгалжуулагч нар “Эхний үед алдсан оноогоо хоёр, гуравдугаар үед нөхөж авна шүү. Бүх хүч, нөөц боломжоо шавхаж гаргаарай” гэж зөвлөсөн юм билээ. Тэр дагуу нь тулалдсан. Ер нь түүнийг ялж чадна гэдэгтээ бүрэн итгэлтэй байсан гэдэг. Тулааны раунд, үе ахих тусам, илүү их итгэл төрж байсан билээ.

        Дэлхийн аваргын хариуцлагатай тулааныг Италийн О.Савчуктэй хийж, түүнийг 5:0-ээр ялж, хүрэл медалийн болзол хангасан. Нэгдүгээр үед өөрийнхөөрөө тулалдсан. Багш нартаа ярилцаад хоёрдугаар үед түүнийг ядрааж, цуцаах, түүний ажиллагааг багасгахын тулд гэдсэнд давтсан хүнд цохилт өгөх тактик ашигласан. Гуравдугаар үед өрсөлдөгчөөс илүү ажиллах, олон оновчтой цохилт хийхээр төлөвлөсөн байдаг. Тэр дагуу л тулаан өрнөж ялалтыг авч чадсан юм.

         М.Энхжаргал 2015 онд өсвөр үеийн ДАШТ-ээс хүрэл медаль хүртэж байлаа. Тэр ДАШТ эхний тойрогт ОХУ-ын боксчинтой, дараагийн тойрогт Хятадын тамирчныг ялж хүрэл медалийн болзол хангасан. Тэгээд мөнгөн медалийн төлөөх тулаанд АНУ-ын бокчинд хожигдож, өсвөр үеийн ДАШТ-ээс хүрэл медаль хүртэж байв. Узбекистан Улсын Ташкент хотод 2022 онд болсон “U22” ангиллын анхдугаар Ази тивийн аварга шалгаруулах тэмцээнд түрүүлж, залуучуудын Азийн аварга болж байлаа. Улмаар 2022 оны сүүлээр дэлхийн цомын тэмцээнд түрүүлсэн. 2022 он ОУХМ М.Энхжаргалд амжилт арвинтай сайхан жил байжээ.

      М.Энхжаргал 2011 онд “Алдар” спорт хороонд Монгол Улсын гавьяат дасгалжуулагч А.Гантулга багшийн шавь болжээ. Одоо хүртэл А.Гантулга багштайгаа цуг, туслах дасгалжуулагч ОУХМ Отгонбаяр багштайгаа ерөнхий бэлтгэлээ хангадаг. Боксын спорт руу орохоос өмнө “Алдар” спорт хорооны хөл бөмбөгийн секцэнд явдаг байсан гэдэг.  Түүний амжилтын гараа 2011 онд “Шижир- Алт” тэмцээнээс хүртсэн мөнгөн медалиар эхэлжээ.