Монголын боксын тамирчдаас “Парис 2024” олимпын анхны эрхийг “Аврагч” спорт хороо, боксын ҮШБ-ийн тамирчин ОУХМ Оюунцэцэгийн Есүгэн хүртсэн. Тэрбээр “Ханжоу 2022” Азийн XIX наадмын боксын эмэгтэйчүүдийн 50 кг-ын жинд тулалдаж “Парис 2024” олимпын эрхийг хүртсэн юм.  О.Есүгэн Азийн наадмын эхний тойрогт Филиппиний Айра Виллегасыг 3:1-ээр буулган авсан. Хоёрдугаар тойрогт Бангладешийн боксчин Зиннат Фердоусыг гурван үеийн турш илүүрхэж 5:0-ийн харьцаагаар ялснаар шигшээ наймд шалгарсан.

          Улмаар шөвгийн наймын тулаанд дэлхийн хошой аварга Казахстаны Назым Кызайбайг 4:1-ээр ялж, хүрэл медалийн болзол хангаж, олимпын эрхээ баталгаажуулсан юм. Улмаар Азийн наадмын хагас шигшээ буюу мөнгөн медалийн төлөөх тулаанд шүүгчдийн саналаар Хятадын Юү Вуд оноогоор ялагдсанаар “Ханжоу 2022” Азийн наадмаас хүрэл медаль хүртсэн билээ.Харин мэргэжлийн боксын “WBО”- холбооны Ази, Номхон далайн орны мэргэжлийн боксын 55.3 кг-ын жинд бүсийн аваргын төлөөх тулааныг 2022 онд Япон Улсын Токио хотод хийж байсан. Тус тулаанд Японы тамирчин Фүживаратай тулалдаж ялснаар Ази, Номхон далайн орны бүсийн аварга болж байлаа.

         Тэрбээр 2022 оны тавдугаар сард Турк Улсын Истанбул хотод болсон боксын насанд хүрэгчдийн дэлхийн аварга шалгаруулах тэмцээнд Тайландын боксчин Прийдакамон Тинтбтайтай эн тэнцүүхэн тулаан хийж шүүгчдийн саналаар 3:2-оор харамсалтай хожигдон дэлхийн аваргын хүрэл медалиас мултарч, тавдугаар байрт шалгарч байв. Харин Йордан Улсын нийслэл Амман хотод болсон Ази тивийн аварга шалгаруулах тэмцээнээс хүрэл медаль хүртсэн.

4

        ОУХМ Оюунцэцэгийн Есүгэн багаасаа л ер нь юм юманд эв дүйтэй  хүүхэд байжээ. Сургуулиас зохиодог арга хэмжээнд бараг бүгдэд нь оролцдог нийгмийн идэвх сайтай охин байсан гэдэг. Бокс хэмээх их спортод хөл тавихаас өмнө нь бүжиглэдэг байж. Бүжгээр чамгүй амжилт үзүүлж байсан гэсэн. Хамтлаг дотроо гоцлол бүжиглэдэг байж.  Мөн сагсан бөмбөг, гар бөмбөгөөр хичээллэдэг, спортод дуртай  байжээ. Анх түүнд боксын спортоор хичээллэх саналыг Сэлэнгэ аймгийн Жавхлант сумын цагдаагийн хэсгийн төлөөлөгч тавьсан гэнэ лээ. Тэгээд сонирхож үзэхээр боксын зааланд ороод, бээлий өмсөөд, хэд цохиж үзээд зөвшөөрч,  маргааш нь Дархан-Уул аймагт зохион байгуулагдсан кик боксын тэмцээнд орсон юм билээ.

         Тэр тэмцээнд III раунд сайн зодолджээ. Тэгээд тэнд байсан боксын багш, шүүгч нар "Бокс мэдэхгүй гэхэд үнэхээр дайчин, ирээдүйтэй охин байна. Улсын аваргад бэлдэж байгаад оруулаарай" гэж багшид нь захижээ. Ингээд л Болдбаатар багш нь Сэлэнгэ аймгийн боксын “Улаан ирвэс” клубийн дасгалжуулагч Г.Ганхуяг багшид аваачиж өгсөн юм билээ. Тэгээд түүний дараа боксын өсвөрийн улсын аваргаас алтан медаль, Азийн хүүхдийн наадмаас хүрэл медаль хүртэж амжилтын гараагаа эхлүүлж байжээ.