Монголын чөлөөт бөхийн холбооны урилгаар Дэлхийн бөхийн нэгдэн холбооны сургагч багш, АНУ-ын мэргэжилтэн, шилдэг дасгалжуулагч Марти Хаук манай улсад айлчилж байна. Тэрбээр дөрвөн өдрийн хөтөлбөртэй бөгөөд өчигдөр Төв аймгийн Батсүмбэр суманд байрлах “Champions” бэлтгэлийн баазаар зочилж, олимпын баг тамирчдад сургалт зохион байгуулжээ.

        Мөн баг тамирчдын бэлтгэл төлөвлөлт болон тамирчдын хувийн төлөвлөгөөнд зөвлөгөө өглөө. Парисын олимпыг зорих Монголын чөлөөт бөхийн баг тамирчид хуваарийн дагуу өчигдрөөс “Champions” бэлтгэлийн баазруу шилжин, төлөвлөгөөний дагуу олимпын бэлтгэлээ үргэлжлүүлж байна.

       Марти Хаукийн тухайд өнөөдөр Жонн Петерсоны нэрэмжит олон улсын тэмцээний үеэр өсвөрийн тамирчидтай ажилладаг багш дасгалжуулагч нарт сургалт орно. Түүнчлэн Монголын чөлөөт бөхийн холбоотой сонгомол бөхийг хөгжүүлэхэд хамтран ажиллахаар тохиролцож, эхний ээлжинд сонгомол бөхийн багш, дасгалжуулагч нарт анхан шатны сургалт зохион байгуулахаар боллоо.