Дэлхийн бөхийн нэгдэн холбооны календарчилсан төлөвлөгөөнд тусгагдсан бөхийн төрлүүдийн “U17” насны Ази тивийн аварга шалгаруулах тэмцээн энэ сарын 22-30-ны өдрүүдэд Йордан Улсын нийслэл Амман хотод зохион байгуулагдана. Тус тэмцээнд оролцох баг бүрэлдэхүүн Йордан Улсыг зорилоо.

         Энэ жилийн УАШТ-д багийн дүнгээр тэргүүлсэн дасгалжуулагчид ААШТ-д оролцох баг тамирчдаа удирдан зохион байгуулахаар шийдвэрлэсэн байна. Төв аймгийн Чөлөөт бөхийн холбоо, Үндэсний шигшээ багийн дасгалжуулагч Л.Энхбаяр, “Алдар” спорт хорооны дасгалжуулагч, гавьяат тамирчин Г.Мандахнаран нар 2024 оны ААШТ-д “U17” насны шигшээ багийн дасгалжуулагчаар ажиллана.

           Монголын чөлөөт бөхийн холбооны зүгээс ААШТ-д оролцох багш дасгалжуулагч нарын зардлыг бүрэн хариуцаж байгаа аж. Мөн энэ удаагийн тэмцээнд манай улсаас анх удаа сонгомол бөхийн эрэгтэйчүүдийн 65 кг-ын жинд Т.Боргил барилдана. Түүний дасгалжуулагчаар сонгомол бөхийн шигшээ багийн дасгалжуулагч С. Мөнхсүх ажиллах юм байна.