Арабын Нэгдсэн Эмират Улсын Абу Даби хотод Олон улсын жүдо бөхийн холбоо, “IJF”-ийн насанд хүрэгчдийн 2024 оны дэлхийн аварга шалгаруулах тэмцээн өнөөдөр эхэлж байна. ДАШТ тавдугаар сарын 19-23-ны өдрүүдэд болох юм. Энэ удаагийн ДАШТ-д 107 улсын эрэгтэй 349, эмэгтэй 309, нийт  658 жүдочин хүч сорино.         “Абу Даби 2024” ДАШТ-ий эрэгтэйчүүд  60 кг-ын Э.Ариунболд, Б.Цогт-Очир, 66 кг-д Ё.Басхүү, Б.Эрхэмбаяр, 73 кг-д Б.Эрдэнэбаяр, Л.Анхзаяа, 81 кг-д Г.Болор-Очир, 90 кг-д Г.Алтанбагана, +100 кг-д О.Цэцэнцэнгэл барилдана. Энэ удаагийн ДАШТ-ийг ОУХМ Батхуягийн Гончигсүрэн, МУГТ Цэнд-Очирын Цогтбаатар нар өнжиж байна. Эмэгтэйчүүд 48 кг-ын жинд Г.Наранцэцэг, Г. Баасанхүү, 52 кг-д Л.Сосорбарам, 57 кг-д Л.Энхрийлэн, М.Ичинхорлоо, 63 кг-д Б.Ганхайч, 70 кг-д Б.Ням-Эрдэнэ, -78 кг-д О.Хүслэн, +78 кг-д А.Адъяасүрэн нар хүч үзнэ.

 ЭРЭГТЭЙЧҮҮДИЙН 60 КГ-Д  Э.АРИУНБОЛД, Б.ЦОГТ-ОЧИР

          Эрэгтэйчүүдийн 60 кг-ын жинд 48 тамирчин барилдах мэдүүлэг өгсөн байна.  Манай улсаас тус жинд  ДАШТ-ий мөнгөн медальт, дэлхийн чансааны 13-д эрэмбэлэгдсэн ОУХМ, Энхтайваны Ариунболд, Азийн аваргын хүрэл медальт, дэлхийн чансааны 29-д эрэмбэлэгдсэн, ОУХМ Бямбажавын Цогт-Очир нар барилдана. Б.Цогт-Очир “В” хэсгийн нэгдүгээр тойрогт Кубын Jonathan CHARON-тай таарсан. Түүнийг ялж чадвал хоёрдугаар тойрогт Израилийн Ariel SHULMAN-тай барилдана. “В” хэсгийг Японы Ryuju NAGAYAMA тэргүүлэн барилдах юм. Энэ хэсэгт Өмнөд Солонгосын KIM Won Jin, Казахстаны Yeldos SMETOV, ОХУ-ын Ayub BLIEV, Азербайжаны Balabay AGHAYEV нарын хүчтэй өрсөлдөгчид орсон байна.

ОУХМ Э.Ариунболд “С” хэсгийн нэгдүгээр тойрогт Азербайжаны Turan BAYRAMOV-тай барилдана. Хэрэв түүнийг ялах юм бол хоёрдугаар тойрогт АНУ-ын David TERAO-тай таарна.

ЭРЭГТЭЙЧҮҮДИЙН 66 КГ-Д  Ё.БАСХҮҮ, Б.ЭРХЭМБАЯР

       Эрэгтэйчүүдийн 66 кг-ын жинд 58 тамирчин барилдах мэдүүлэг өгсөн байна. Тус жинд  ДАШТ-ий хошой хүрэл медальт, МУГТ, дэлхийн чансааны тавд эрэмбэлэгдсэн Ёндонпэрэнлэйн Басхүү, Азийн тивийн аварга, дэлхийн чансааны дөрөвт бичигдсэн ОУХМ Баттогтохын Эрхэмбаяр, АНЭУ-ын нэр дээр барилдаж буй дэлхийн чансааны 18-д бичигдсэн, Азийн наадмын хүрэл медальт ОУХМ Баянмөнхийн Нармандах нар хүч сорино.

ОУХМ Б.Эрхэмбаяр “С” хэсгийг тэргүүлэн нэгдүгээр тойргийн барилдаанд гоц мөргөн ялалт авсан байгаа. Хоёрдугаар тойрогт Венусуэль, Туркменистаны бөхчүүдийн хэн ялсантай барилдана.

МУГТ Ё.Басхүү “D” хэсгийг  тэргүүлэн  нэгдүгээр тойрогт гоц мөргөн ялалт авсан байгаа. Хоёрдугаар тойрогт Италийн Elios MANZI, Словакын Matej POLIAK нарын хэн ялсантай барилдана.

ОУХМ Б.Нармандах “D” хэсгийн нэгдүгээр тойрогт ОХУ-ын Murad CHOPANOV-той таарсан. Түүнийг ялах юм бол хоёрдугаар тойрогт Гүржийн Vazha MARGVELASHVILI-тай барилдана.

 ЭРЭГТЭЙЧҮҮДИЙН 73 КГ-Д  Б.ЭРДЭНЭБАЯР, Л.АЗЗАЯА

       Эрэгтэйчүүдийн 73 кг-ын жинд 52 тамирчин барилдах мэдүүлэг өгсөн байна. Тус жинд манай улсаас дэлхийн чансааны 28-д эрэмбэлэгдсэн, ОУХМ Батзаяагийн Эрдэнэбаяр, дэлхийн чансааны 98-д эрэмбэлэгдсэн, ОУХМ Лавжаргалын Анхзаяа  нар барилдана.

ОУХМ Б.Эрдэнэбаяр “В” хэсгийн нэгдүгээр тойрогт Молдавын Petru PELIVAN-тай таарсан. Түүнийг ялах юм бол хоёрдугаар тойрогт Тажикстаны Behruzi KHOJAZODA-тай барилдана.

ОУХМ Л.Анхзаяа “D” хэсгийн нэгдүгээр тойрогт Живоутын Aden-Alexandre HOUSSEIN таарсан. Түүнийг ялах юм бол хоёрдугаар тойрогт Гүржийн олимп, дэлхийн аварга Lasha SHAVDATUASHVILI-тай барилдана.

 ЭРЭГТЭЙЧҮҮДИЙН 81 КГ-Д Г.БОЛОР-ОЧИР

           Эрэгтэйчүүдийн 81 кг-ын жинд 60 тамирчин барилдах мэдүүлэг өгсөн байна. Тус жинд манай улсаас дэлхийн чансааны 36-д эрэмбэлэгдсэн, ОУХМ Гэрэлтуяагийн Болор-Очир хүч үзнэ. Тэрбээр “С” хэсгийн нэгдүгээр тойрогт Хонконгийн LEE Kwok Wing-тай барилдана. Түүнийг ялах юм бол хоёрдугаар тойрогт Египет, Бразилын бөхчүүдийн хэн ялсантай таарна.

 ЭРЭГТЭЙЧҮҮДИЙН 90 КГ-Д Г.АЛТАНБАГАНА

         Эрэгтэйчүүдийн 90 кг-ын жинд 50 тамирчин барилдах мэдүүлэг өгсөн байна. Тус жинд манай улсаас дэлхийн чансааны 34-д эрэмбэлэгдсэн, Ази тивийн аваргын мөнгөн медальт, ОУХМ Гантулгын Алтанбагана хүч үзнэ. Тэрбээр “D” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Англи, Өмнөд Солонгосын бөхчүүдийн хэн ялсантай барилдана.

ЭРЭГТЭЙЧҮҮДИЙН +100 КГ-Д О.ЦЭЦЭНЦЭНГЭЛ

        Эрэгтэйчүүдийн +100 кг-ын жинд 40 тамирчин барилдах мэдүүлэг өгсөн байна. Тус жинд манай улсаас дэлхийн чансааны 17-д эрэмбэлэгдсэн ОУХМ Одхүүгийн Цэцэнцэнгэл барилдана. Тэрбээр “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Германы Losseni KONE-той барилдана.

ЭМЭГТЭЙЧҮҮДИЙН 48 КГ-Д Г.НАРАНЦЭЦЭГ, Б.БААСАНХҮҮ

          Эмэгтэйчүүдийн 48 кг-ын жинд 48 тамирчин барилдах мэдүүлэг өгсөн байна. Тус жинд манай улсаас дэлхийн чансааны 17-д бичигдсэн ОУХМ Ганбаатарын Наранцэцэг, дэлхийн чансааны тавд  бичигдээд буй Ази тивийн шинэхэн аварга ОУХМ Бавуудоржийн Баасанхүү нар барилдана.

ОУХМ Г.Наранцэцэг “В” хэсгийн нэгдүгээр тойрогт Хонконгийн Ka Lee WONG-тай таарсан. Түүнийг ялах юм бол хоёрдугаар тойрогт Сербийн Milica NIKOLIC-тай барилдана.

ОУХМ Б.Баасанхүү “D” хэсгийг тэрүүлэн, нэгдүгээр тойрогт гоц мөргөн ялалт авсан байгаа. Хоёрдугаар тойрогт Брунди, АНУ-ын бөхчүүдийн хэн ялсантай нь барилдана.

ЭМЭГТЭЙЧҮҮДИЙН 52 КГ-Д Л.СОСОРБАРАМ, АНЭУ-ЫН Б.ХОРЛООДОЙ

          Эмэгтэйчүүдийн 52 кг-ын жинд 43 тамирчин барилдах мэдүүлэг өгсөн байна. Тус жинд манай улсаас дэлхийн чансааны 13-д эрэмбэлэгдсэн, дэлхийн залуучуудын аварга, Азийн аваргын хүрэл медальт, ОУХМ Лхагвасүрэнгийн Сосорбарам, АНЭУ-ын нэр дээр барилдаж буй Ази тивийн шинэхэн аварга, ОУХМ Бишрэлтийн Хорлоодой нар хүч сорино.

ОУХМ Л.Сосорбарам “В” хэсгийн нэгдүгээр тойрогт Испанийн Ariane TORO SOLER-тай таарсан. Түүнийг хэрэв буулган авч чадвал хоёрдугаар тойрогт Израилийн Gefen PRIMO-той барилдана.

ОУХМ Б.Хорлоодой “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Өмнөд Солонгосын JANG Seyun-тэй барилдана.

ЭМЭГТЭЙЧҮҮДИЙН 57 КГ-Д Л.ЭНХРИЙЛЭН,  М.ИЧИНХОРЛОО, АНЭУ-ЫН Б.АЛТАНЦЭЦЭГ

         Эмэгтэйчүүдийн 57 кг-ын жинд 41 тамирчин барилдах мэдүүлэг өгсөн байна. Тус жинд манай улсаас дэлхийн чансааны 22-д эрэмбэлэгдсэн, ДАШТ-ий хошой хүрэл медальт, Ази тивийн аварга, дэлхийн чансааны 17-д эрэмбэлэгдсэн МУГТ Лхагватогоогийн Энхрийлэн, дэлхийн чансааны 50-д бичигдсэн ОУХМ Мөнхцэдэвийн Ичинхорлоо, АНЭУ-ын нэр дээр барилдаж буй дэлхийн чансааны 38-д эрэмбэтэй ОУХМ Батсүхийн Алтанцэцэг нар  барилдана.

МУГТ Л.Энхрийлэн “С” хэсгийн нэгдүгээр тойрогт Австрийн Laura KALLINGER-тай таарсан. Түүнийг ялах юм бол хоёрдугаар тойрогт Германы Pauline STARKE-тай барилдана.

ОУХМ М.Ичинхорлоо “В” хэсгийн нэгдүгээр тойрогт Энэтхэгийн Yamini MOURYA-тай таарсан. Түүнийг ялах юм бол хоёрдугаар тойрогт Өмнөд Африкийн Jasmine MARTIN-тай барилдана.

ОУХМ Б.Алтанцэцэг “В” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Сербийн  Marica PERISIC-тэй барилдана.

ЭМЭГТЭЙЧҮҮДИЙН 63 КГ-Д Б.ГАНХАЙЧ

           Эмэгтэйчүүдийн 63 кг-ын жинд 49 тамирчин барилдах мэдүүлэг өгсөн байна. Тус жинд манай улсаас дэлхийн чансааны 31-д эрэмбэлэгдсэн, Ази тивийн аварга, ОУХМ Болдын Ганхайч барилдана. Тэрбээр “В” хэсгийн нэгдүгээр тойрогт АНУ-ын Hannah MARTIN-тай таарсан. Түүнийг ялах юм бол хоёрдугаар тойрогт Израилийн SHARIR Gili-тэй барилдана.

 ЭМЭГТЭЙЧҮҮДИЙН 70 КГ-Д Б.НЯМ-ЭРДЭНЭ

        Эмэгтэйчүүдийн 70 кг-ын жинд 47 тамирчин барилдах мэдүүлэг өгсөн байна. Тус жинд манай улсаас дэлхийн чансааны 43-д эрэмбэлэгдсэн, Азийн аварга шалгаруулах тэмцээний хүрэл медальт, ОУХМ Батсуурийн Ням-Эрдэнэ хүч үзнэ. Тэрбээр “D” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Коста Рика, Шведийн бөхчүүдийн хэн ялсантай барилдана.

ЭМЭГТЭЙЧҮҮДИЙН -78 КГ-Д О.ХҮСЛЭН

          Эмэгтэйчүүдийн -78 кг-ын жинд 41 тамирчин барилдах мэдүүлэг өгсөн байна. Тус жинд манай улсаас дэлхийн чансааны 29-д эрэмбэлэгдсэн, Азийн аварга шалгаруулах тэмцээний хүрэл медальт, ОУХМ Отгонбаярын Хүслэн барилдана. Тэрбээр “С” хэсгийн нэгдүгээр тойрогт Габоны Karene AGONO WORA-тай таарсан. Түүнийг ялах юм бол хоёрдугаар тойрогт Өмнөд Солонгосын YOON Hyunji-тай барилдана.

 ЭМЭГТЭЙЧҮҮДИЙН +78 КГ-Д А.АДЪЯАСҮРЭН

             Эмэгтэйчүүдийн +78 кг-ын жинд 40 тамирчин барилдах мэдүүлэг өгсөн байна. Тус  жинд манай улсаас дэлхийн чансааны 18-д эрэмбэлэгдсэн, Азийн аваргын мөнгөн медаль ОУХМ Амарсайханы Адъяасүрэн өрсөлдөнө. Тэрбээр “В” хэсгийн нэгдүгээр тойрогт Японы TOMITA Wakaba-тай таарсан. Хэрэв түүнийг буулган авч чадвал хоёрдугаар тойрогт Португалийн Rochele NUNES-тэй барилдана.