2024 оны олимп, паралимпын наадамд оролцох Үндэсний шигшээ багийн бэлтгэл ажлыг зохион байгуулалтаар хангах Үндэсний хороо дөрөвдүгээр сарын 10-ны өдөр хуралдаж, дараах асуудлуудыг хэлэлцлээ. Үүнд “Парис 2024” Олимпын наадамд оролцох Монголын баг тамирчдын хувцасны үйлдвэрлэгч болон загварыг сонгон шалгаруулахаар 18-60 насны 9.222 иргэн, Үндэсний шигшээ багийн 303 хүний дунд санал асуулга явуулж, 17 брэндийг нэрлэсэн байна.

           Үүний хүрээнд МҮОХ-ноос хамгийн өндөр санал авсан 10 байгууллагатай хамтран ажиллах үйл ажиллагаа өрнүүлж, “Michel & Amazonka” брэнд баг тамирчдын ёслолын хувцсыг, “Mizuno” брэнд спортын хувцсыг урлахаар шийдвэрлэжээ.

             “Парис 2024” олимпын наадам үргэлжлэх хугацаанд Парис хотын “La Villette” паркт Монгол үндэсний соёл, ёс заншил, “Go Mongolia” брэндийг дэлхийн улс орнуудад сурталчлах “Mongolia house” төсөл хэрэгжих билээ. Тус паркт 20 гаруй орны “house” үйл ажиллагаагаа өрнүүлэх бөгөөд “Mongolia house” нь 922 м.кв талбайд долдугаар сарын 27-оос, наймдугаар сарын 11-ний өдрүүдэд өдөр бүр 10:00-23:00 цагт олон нийтэд нээлттэй байна.

       Төр, засгийн зүгээс 2024 онд Парисын олимп, паралимпыг дэмжих үйл ажиллагаанд 2.2 тэрбум төгрөг зарцуулах бол баг, тамирчдын цалинд 5.6 тэрбум төгрөг төсөвлөсөн байна. Энэ удаагийн олимпод Монголын баг тамирчид 12 спортын төрлөөр 45 эрх авч, 4-5 медаль хүртэхийг зорьж байгаа аж.

       Паралимпын наадамд долоон спортын төрлөөр 12 эрх авч, 2-3 медаль авах зорилт тавин ажиллаж байгаа юм байна. Одоогоор олимпын зургаан спортын төрөлд 10 эрх, паралимпын гурван төрөлд дөрвөн эрх баталгаажаад байна.