Чөлөөт бөхийн “U23” хүртэлх насны УАШТ 2024 оны хоёрдугаар сарын 24-25-ны өдрүүдэд "Алдар" спорт хорооны зааланд явагдаж өндөрлөсөн билээ. Тус УАШТ-ий эмэгтэйчүүдийн 65 кг-ын жинд алтан медаль хүртсэн “Төв-Арж” клубийн тамирчин, “Мон-Алтиас” их сургуулийн оюутан  Эрдэнэ-Очирын Одгэрэлтэй ярилцлаа.

-Чөлөөт бөхийн 2024 оны “U23” насны улсын аварга шалгаруулах тэмцээний 65 кг-ын жинд алтан медаль хүртсэнд баяр хүргэе.

- Танд их баярлалаа.

-Миний дүү өөрийгөө танилцуулахгүй юу?

       -Намайг Эрдэнэ-Очирын Одгэрэл гэдэг. Би Увс аймгийн Малчин суманд 2005 онд төрсөн. Одоо 19 настай. Төв аймгийн Батсүмбэр суманд амьдардаг. Манайх ам бүл наймуулаа. Би дээрээ хоёр эгч, доороо гурван дүүтэй.  Манай гэр бүл аав, ээж,  зургаан охины хамт аз жаргалтай амьдарч байна. Миний хувьд Төв аймгийн ерөнхий боловсролын 4-р дунд сургуулийг төгссөн. Одоо” Мон-Алтиус” Биеийн тамирын их сургуулийн нэгдүгээр курсийн оюутан.

-Чөлөөт бөхийн спортыг сонирхож хичээллэх болсон түүхээсээ сонирхуулахгүй юу?

       -Миний анхны багш маань намайг чөлөөт бөхөд оруулж байсан. Ер нь би багаасаа эршүүд охин байлаа. Морь унах хоббитой хүүхэд байсан. Багш намайг анх дуудаж уулзаад “За чи барилдах хэр сонирхолтой хүүхэд вэ. Гурван цагаас спорт зааланд заавал  ирнэ шүү” гэсэн. Тэр цагаас хойш чөлөөт бөхөөр өнөөг хүртэл, тасралтгүй хичээллэж байгаа.

-Чөлөөт бөхөөр хэд дэх жилдээ хичээллэж байгаа вэ?

        -2017 онд хичээллэж эхэлсэн. Одоо долоо дахь жилдээ чөлөөт бөхөөр хичээллэж байна.

-Чөлөөт бөхийг анх Л.Энхбаяр багшаар заалгасан уу?

        -Үгүй ээ, анх Ц.Бат-Эрдэнэ багшаар чөлөөт бөхийг заалгасан. Миний  спортын суурь, гарааг эхэлж тавьж өгсөн  Ц.Бат-Эрдэнэ багшдаа баярлаж явдаг. Ц.Бат-Эрдэнэ багш намайг 2018 онд  Төв аймгийн төв рүү Л.Энхбаяр багшийн шавь болгож өгсөн. Тэр цаг үеэс хойш Л.Энхбаяр багшийнхаа удирдлага доор бөхийн спортоор хичээллэж байгаа.

-Чөлөөт бөхөөр өөрийн гаргасан амжилтуудаасаа сонирхуулахгүй юу?

       -Чөлөөт бөхийн “U17” насны өсвөр үеийн улсын аварга шалгаруулах тэмцээнд нэг удаа түрүүлж байсан. “U20” ангиллын УАШТ-ээс хошой мөнгөн медальтай. Энэ жил “U23” ангиллын УАШТ-ээс алтан медаль хүртсэн.

-Танай “Төв-Арж” шинээр байгууллагдсан клуб уу?

     -Манай клуб анх Төв аймгийн баг гэдэг нэрээр тэмцээнд оролцдог байсан. Одоогоос хоёр жилийн өмнөөс эхлэн “Төв-Арж” клубийг байгуулсан.

-Чөлөөт бөхийн 2024 оны насанд хүрэгчдийн УАШТ-д барилдсан уу?

      -2024 оны насанд хүрэгчдийн УАШТ-д жин өгсөн 68 кг жинд барилдсан.

-Энэ жилийн “U23” насны УАШТ-ий алтан медалийн төлөө “Алдар” спорт хорооны тамирчин, цэргийн дэлхийн аварга, 2024 оны насанд хүрэгчдийн  УАШТ-ий хүрэл медальт Н.Нархажидтай тэнцүүхэн, ширүүн өрсөлдөөн өрнүүлсэн. Оноогоор хожигдож яваад цаг дуусахын өмнө оноогоо 5:5 болгож, сүүлд авсан оноогоор яллаа. Өмнө нь Н.Нархажидтай барилдаж байв уу?

     -Н.Нархажидтай барилдаж байсан. Хамгийн сүүлд энэ жил “U23” ангиллын УАШТ-ий эхний барилдаандаа хожигдсон. Харин хэсгийн барилдаанаас гарч, аваргын төлөө дахин барилдахдаа алдаагаа засан түүнийг ялж  чадлаа.

- Н.Нархажидыг бярдаж барилдаад ялчих шиг харагдсан. Өөрийгөө хэр их бяртай гэж боддог вэ?

         - Хүмүүс намайг бяртай  гээд л байдаг юм. Ер нь бол 65 кг-ын жингийнхэн дотроо давгүй бяртайд нь тооцогдох байх шүү.

 -Чөлөөт бөхийн барилдааны арга барил, мэх, техникийг хэр амжилттай сурч байна вэ? 

      -Амжилттай суралцаж байна. Илүү ихийг сурч амжилт гаргахын төлөө хичээж, зүтгэж байгаа.