Олон улсын сагсан бөмбөгийн холбоо, ФИБА-аас дэлхийн тив бүрийн сагсан бөмбөгийн лигийн аварга клубүүдийн дунд “Basketball Champions League” (BCL)-г тив бүрт зохион байгуулж эхлээд байгаа билээ. Монголын сагсан бөмбөгийн холбоо “МСБХ”-оос өнгөрсөн оны наймдугаар сард болсон ФИБА Конгрессын үеэр ФИБА-тай уулзаж тус лигт Монголын клубүүд, лигийн аварга багуудаа оролцуулах хүсэлтээ албан ёсоор тавьж Үндэсний дээд лигээ холбохоор төлөвлөн хамтран ажиллаж эхэлсэн юм.

         Ийнхүү өнгөрөгч оны наймдугаар сараас эхэлсэн ФИБА-тай хийсэн хэлэлцээр үр дүнд хүрч МСБХ өнгөрсөн сард албан ёсны гэрээ байгуулж, өчигдөр ФИБА-аас албан ёсоор зарлалаа. ФИБА-тай хийсэн гэрээний хүрээнд: 1. Монгол Улсад “BCL-Asia Qualifier Round 1”-ийг дөрөвдүгээр сарын 3-7-ны өдрүүдэд зохион байгуулах эрхийг авсан байна.

         Монгол Улсын үндэсний лигийн аварга баг Монгол Улсаа төлөөлөн “BCL-Asia”-д өрсөлдөх боллоо.  2024 оны “Round 1”-ийг зохион байгуулах эрхийг авсан тул зохион байгуулагч орны давуу эрхээр Монгол Улс хоёр  баг оруулах эрхтэй боллоо. Ингэснээр 2023-2024 оны улирлын Финалд үлдсэн багууд “BCL-Asia Qualifier Round 1”-д өрсөлдөх эрхтэй болно.

         Манай улсад найман баг, хоёр хэсэгт хуваагдан өрсөлдөж дөрвөн баг хоёрдугаар шатанд шалгарна. Хоёрдугаар шатнаас хоёр баг “BCL Asia”-д “PBA”, “CBA”, “KBL”, “B League”, “FIBA WASL”-аас шалгарсан багуудтай Азийн хамгийн хүчирхэг багуудтай ирэх зургадугаар сард өрсөлдөх боломжтой болно.