Олимпын наадмын хөтөлбөрт багтдаг скейтбордын дөрөв дэх удаагийн УАШТ "Буянт-Ухаа" спорт ордонд эхэллээ. Энэ жилийн тэмцээнд 13 тамирчин өрсөлдөж байна. Тамирчид эхний шатанд гурван хэсэгт хуваагдан үзүүлбэрээ толилуулах бөгөөд хэсэг бүрээс шалгарсан хоёр, нийт зургаан тамирчин финалд үлдэж, цааш медалийн төлөө өрсөлдөх юм.

          Өвлийн улиралд тамирчдын бэлтгэл муу байдаг учир цөөн хүн оролцож байгааг "Уухай" скейтбордын холбооны гүйцэтгэх захирал Б.Баянмөнх тайлбарласан. "Холбооны зүгээс жилдээ 4-5 арга хэмжээ тогтмол зохион байгуулж байна. Өнгөрсөн жил бид ОУХ-д болдог хамгийн том тэмцээн Grand Skate Tour болон Малайзын олон улсын тэмцээнд оролцсон. Мөн Нанжиньд болсон олон улсын сургалтад хамрагдаж байна.

         Скейтборд олимпын хөтөлбөрт багтсан гэдэг утгаараа хичээллэх сонирхолтой залуусын тоо нэмэгдэж байгаа. Одоо скейтбордоор тууштай хичээллэдэг 2000 гаруй хүн байна" хэмээн Б.Баянмөнх сонирхуулсан юм. Өмнөх хоёр УАШТ-д дараалан түрүүлээд буй Г.Сумъяабазар аваргаа хамгаалах уу, шинэ аварга төрөх үү гэдгийг шийдэх өрсөлдөөн "Буянт-Ухаа" спортын ордонд болж байна.