Хийн буудлагын УАШТ-ий оролцогч 130 тамирчнаас Сэлэнгэ аймгаас ирж оролцож буй ихэр охид анхаарал татаж байна. Сэлэнгэ аймгийн Мандал сумын "Онч мэргэн хараа" клубийн тамирчид болох Ялалтын Маргад, Ялалтын Марал нар УАШТ-д амжилттай буудаж, хоёул спортын мастерын болзол хангасан юм. Тэд өнгөрсөн жил Баянхонгор аймагт болсон хүүхдийн спортын наадамд мөн хамтдаа дэд мастерын болзол хангаж байжээ.

        Ихэр охидын амжилт хүртэл ихэр байх тавилантай аж. Сонирхуулахад, тэд буудлагын спортоор хичээллээд яг нэг жил болж байгаа бөгөөд Мандал сумын ерөнхий боловсролын 3-р сургуулийн 10-ын “В” ангийн сурагчид юм. "Ганцхан жилийн дотор дэд мастер, спортын мастер цол дараалж авна гэдэг олон тохиох зүйл биш л дээ. Энэ хоёр маань үнэхээр авьяастай болохоор ийм богино хугацаанд амжилт гаргаж байна.

       Сэлэнгэ аймгийн аварга шалгаруулах тэмцээнд Маргад түрүүлж, Марал мөнгөн медаль авсан байна. Мөн залуучуудын УАШТ-д хамтдаа мөнгө, хүрэл медаль хүртсэн. Ер нь аймагтаа энэ хоёр л хоорондоо өрсөлддөг юм" хэмээн "Онч мэргэн хараа" клубийн дасгалжуулагч Э.Юмжирмаа сонирхуулав.

          Ихэр авьяастнууд холбоодын нэгдсэн УАШТ-ий үндсэн дасгалд одоогоор ес болон 7-р байрт явна. Эхний наймд орсон тамирчид финалд шалгарч, цааш медалийн төлөө өрсөлдөх билээ.