Өмнөд Солонгосын Канвон мужийн дөрвөн хотод болох залуучуудын өвлийн IV олимпын наадмын нээлт хоёр хоногийн дараа болж, тив тивийн залуусын дөрвөн жил хүлээсэн өрсөлдөөн эхлэх юм. Эдгээр өдрүүдэд зохион байгуулагчид 80 орны 1900 тамирчин болон албаныхан, хөгжөөн дэмжигчдийн багийг угтан авсаар байна.

          Олимпын наадмын нээлт болох Каннин хот дахь Олимпын парк орчимд ирэх сарын 2-ны өдрийг хүртэл дрон нисгэхийг түр хоригложээ. "Gangwon 2024" өвлийн олимпын наадмын зохион байгуулах хороо болон Каннин хотын захиргаанаас аюулгүй байдлын сэрэмжлүүлгийг гаргаж, цагдаагийн бие бүрэлдэхүүн 24 цагийн турш ажиллаж байна. Олимпын парк буюу уран гулгалт, хоккей, кёрлинг, шорт-трекын байгууламжийн эргэн тойронд дрон нисгэхийг тур хугацаагаар хоригложээ.

           "GANGWON 2024" залуучуудын өвлийн олимпын наадмын нээлт нэгдүгээр сарын 19-д Каннин хотын Олимпын паркад болох ба олимп угтсан олон арга хэмжээг зохион байгуулж байна. Олимпын наадамд 80 орны 15-18 насны залуучууд оролцож буй энэ удаагийн өвлийн олимп "Парис 2024" зуны олимпын наадмын өмнө болж байгаагаараа ихээхэн онцлогтой. Мөн Ази тивд анх удаа залуучуудын өвлийн олимп нээлтээ хийх ба БНСУ-ын ард иргэд гурав дахь олимпын зохион байгуулалтад оролцож байгаа юм.

             "Пёнчан 2018" өвлийн олимпын наадмын байгууламжид болох залуучуудын олимпод Монголын 12 тамирчин эрхээ авсан билээ. Гүйлтийн болон уулын цанын тамирчид Пёнчан хотын Хэнгэ дэх "Alpensia" олимпын цасан замд бэлтгэлдээ гарсан бол биатлоны залуучуудын баг Германаас өнөөдөр БНСУ-д ирнэ.

           Монголын багийн тэмцээн уралдаан нэгдүгээр сарын 20-ны өдөр биатлоноор эхэлж, хоёрдугаар сарын 1-ний өдөр гүйлтийн цанаар өндөрлөх юм. Биатлоны тэмцээн Пёнчан хотын Хэнгэ дэх "Alpensia" биатлоны талбайд болно.