Чөлөөт бөхийн 2024 оны УАШТ гурав дахь өдрөө үргэлжилж өндөрлөв. УАШТ-ий эмэгтэйчүүдийн 65 кг-ын медальтнууд тодорлоо. Энэ жингийн финалд “Аваргууд академи”-ийн Т.Энхжин “Цаст тайга” клубийн Д.Түмэнхүслэнг 8:2-оор хожсон юм.

         Тэрбээр 2022 онд насанд хүрэгчдийн УАШТ-д анх удаа ороод хоосон хоцорсон бол өнгөрсөн жил анхны хүрэл медалиа хүртсэн. Харин энэ жил урамтай барилдаж, учраа бүрээ ялсаар улсын аваргад анх удаа түрүүллээ.

        Энэ амжилтаараа тэрбээр Азийн аварга шалгаруулах тэмцээнд Монгол Улсаа төлөөлөн оролцох эрхтэй болсон юм. Энэ жингийн хүрэл медалийг “Алдар-2” багийн Н.Нархажид, “Аваргууд академи”-ийн 18 настай залуу тамирчин Э.Аззаяа нар хүртлээ.